پی ایس ایل x ; کوئٹہ گلیڈی ایٹرز نے پشاور زلمی کو 80 رنز سے شکست دے دی
پشاور زلمی کی ٹیم 217 رنز کا تعاقب کرتے ہوئے 16 اوور میں 136 رنز بنا کر آؤٹ ہوگئی۔
پی ایس ایل 10: کوئٹہ گلیڈی ایٹرز نے پشاور زلمی کو 80 رنز سے شکست دے دی
راولپنڈی: ایچ بی ایل پی ایس ایل سیزن 10 کے دوسرے میچ میں کوئٹہ گلیڈی ایٹرز نے پشاور زلمی کو 80 رنز سے شکست دے دی۔
راولپنڈی میں کھیلے گئے ایونٹ کے دوسرے میچ میں پشاور زلمی کی ٹیم 217 رنز کا تعاقب کرتے ہوئے 16 اوور میں 136 رنز بنا کر آؤٹ ہوگئی۔
زلمی کی جانب سے جارح مزاج بلےباز صائم ایوب 50 رنز بنا کر نمایاں رہے، حسین طلعت 35، مچل اوون 31، محمد حارث 13 اور سفیان مقیم 1 رن بنا کر آؤٹ ہوئے۔
پشاور زلمی کے پانچ کھلاڑی کپتان بابر اعظم، ٹام کوہلرکیڈمور، میکس برائنٹ، الزاری جوزف اور محمد علی بغیر کوئی رن بنائے پویلین لوٹے۔ کوئٹہ گلیڈی ایٹرز کی جانب سے ابرار احمد نے 4، محمد عامر اور عثمان طارق نے 2، 2 اور کائل جیمیسن نے 1 کھلاڑی کو آؤٹ کیا۔
اس سے قبل پشاور زلمی کی دعوت پر پہلے بیٹنگ کرتے ہوئے کوئٹہ گلیڈی ایٹرز نے مقررہ اوورز میں 3 وکٹوں کے نقصان پر 216 رنز بنائے۔
گلیڈی ایٹرز کی جانب سے سعود شکیل نے 59 اور فن ایلن نے 53 رنز بنائے، حسن نواز 41 رنز بنا کر آؤٹ ہوئے جبکہ کوسل مینڈس 35 اور رائلے روسو 21 رنز بنا کر ناٹ آؤٹ پویلین لوٹے۔
پشاور زلمی کی جانب سے علی رضا، سفیان مقیم اور الزاری جوزف نے ایک ایک وکٹ حاصل کی۔
