پی ایس ایل x ; لاہور قلندرز نے کوئٹہ گلیڈی ایٹرز کو 79 رنز سے شکست دیدی
220 رنز کے ہدف کے تعاقب میں کوئٹہ گلیڈی ایٹرز کی پوری ٹیم 16.2 اوورز میں 140 رنز بنا کر آؤٹ ہوگئی، ریلی روسو 44 رنز کیساتھ نمایاں رہے۔
پی ایس ایلx : لاہور قلندرز نے کوئٹہ گلیڈی ایٹرز کو 79 رنز سے شکست دیدی
راولپنڈی: پاکستان سپر لیگ سیزن 10 کے چوتھے میچ میں لاہور قلندرز نے کوئٹہ گلیڈی ایٹرز کو 79 رنز سے شکست دے دی۔ 220 رنز کے ہدف کے تعاقب میں کوئٹہ گلیڈی ایٹرز کی پوری ٹیم 16.2 اوورز میں 140 رنز بنا کر آؤٹ ہوگئی، ریلی روسو 44 رنز کیساتھ نمایاں رہے۔
کوئٹہ گلیڈی ایٹرز کی جانب سے اننگز کا آغاز کپتان شان مسعود اور فن الین نے کیا جو انتہائی مایوس کن ثابت ہوا اور شان مسعود ایک رن جبکہ فن الین بغیر کوئی رن بنائے پویلین لوٹ گئے۔
گلیڈی ایٹرز کی جانب سے حسن نواز بھی ایک رن بنا کر چلتے بنے، کوشال مینڈس28، رلی روسو44، شعیب ملک 14 ، عقیل حسین 13، محمد عامر ایک اور ابرار احمد 6 رنز بناکر پویلین لوٹ گئے۔
لاہور قلندرز کی جانب سے راشد حسین نے 3، شاہین شاہ آفریدی، آصف آفریدی اور سکندر رضا نے 2، 2 جبکہ حارث رؤف نے ایک وکٹ حاصل کی۔
قبل ازیں راولپنڈی کرکٹ سٹیڈیم میں ہونیوالے میچ میں لاہور قلندرز نے گلیڈی ایٹرز کی دعوت پر پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 219 رنز بنائے، فخر زمان نے 67 رنز کی شاندار اننگز کھیلی۔
لاہور قلندرز کی جانب سے اننگز کا آغاز فخر زمان اور محمد نعیم نے کیا مگر یہ جوڑی زیادہ دیر تک ساتھ نہ نبھا سکی اور محمد نعیم 10 رنز کی اننگز کھیل کر ابرار کی گیند پر کلین بولڈ ہو گئے۔
قلندرز کی جانب سے عبداللہ شفیق اور ڈیرل مچل 37، 37 رنز بناکر پویلین لوٹے جبکہ محمد نعیم 10، سکندر رضا 6 اور کپتان شاہین شاہ آفریدی 3 رنز بناکر چلتے بنے، سیم بلنگز 50 اور راشد حسین ایک سکور کیساتھ ناٹ آؤٹ رہے۔
گلیڈی ایٹرز کی جانب سے عقیل حسین اور ابرار احمد نے 2،2 جبکہ فہیم اشرف اور عثمان طارق نے ایک ایک وکٹ حاصل کی۔
یاد رہے کہ افتتاحی میچ میں لاہور قلندرز کو دفاعی چیمپئن اسلام آباد یونائیٹڈ کے خلاف 8 وکٹ سے شکست ہوئی تھی جب کہ کوئٹہ گلیڈی ایٹرز نے گزشتہ روز پشاورزلمی کو 80 رنز سے مات دی تھی۔
