پریذیڈنٹ ٹرافی گریڈ ٹو کا منگل سے آٹھ شہروں میں آغاز

پریذیڈنٹ ٹرافی گریڈ ٹو کا منگل سے آٹھ شہروں میں آغاز۔

فائنل 22 سے 25 مئی تک کھیلا جائے گا۔

فاتح ٹیم آئندہ سیزن میں پریذیڈنٹ ٹرافی گریڈ ون میں کوالیفائی کرے گی۔

لاہور ۔ پریذیڈنٹ ٹرافی گریڈ ٹو 2024-25 منگل 15 اپریل سے آٹھ شہروں ایبٹ آباد، ہری پور، اسلام آباد، کراچی، لاہور، راولپنڈی، شیخوپورہ اور صوابی میں شروع ہوگی۔

85 میچوں پر مشتمل ٹورنامنٹ میں تین روزہ میچز شامل ہیں ، فائنل چار روزہ ہوگا جو 22 سے 25 مئی تک کھیلا جائے گا۔ اس ریڈ بال ٹورنامنٹ میں پاکستان بھر کے 400 سے زائد کھلاڑیوں کو اپنی صلاحیتوں کا مظاہرہ کرنے کا موقع ملے گا۔

ٹورنامنٹ کی فاتح ٹیم کو 50 لاکھ روپے انعام دیا جائے گا، جبکہ رنر اپ ٹیم کو25 لاکھ روپے ملیں گے۔
فاتح ٹیم ایشال ایسوسی ایٹس کی جگہ اگلے ڈومیسٹک سیزن میں پریذیڈنٹ ٹرافی گریڈ ون کے لیے بھی کوالیفائی کر لے گی۔

ٹورنامنٹ میں کل 27 ڈیپارٹمنٹل ٹیمیں حصہ لے رہی ہیں جنہیں چار گروپس میں تقسیم کیا گیا ہے۔ ہر گروپ کی دو ٹاپ ٹیمیں 14 سے 16 مئی تک ہونے والے کوارٹر فائنل مرحلے کے لیے کوالیفائی کریں گی، جبکہ سیمی فائنلز 18 سے 20 مئی تک ہوں گے۔

پریذیڈنٹ ٹرافی گریڈ ٹو کے ناک آؤٹ مرحلے کے مقامات کا اعلان بعد میں کیا جائے گا۔

گروپ اے (کراچی) کنگز مین، نیوی، پاک سعودی انٹرنیشنل، پاکستان کسٹمز، پورٹ قاسم اور ونگ 999 اسپورٹس

گروپ بی (اسلام آباد اور راولپنڈی) آرمی، کیپٹل ڈیولپمنٹ اتھارٹی (سی ڈی اے)، غنی انسٹی ٹیوٹ، جے ڈی ڈبلیو شوگر ملز، جے جے کنسلٹنسی گروپ، ونٹین کمیونیکیشن اور پی ایچ اے راولپنڈی۔

گروپ سی (ایبٹ آباد، صوابی اور ہری پور) حیدر کرکٹ کلب، ایم آئی ٹی سلیوشنز، پی اے ایف، سردار گروپ، سروس انڈسٹریز، ایس این ایس جے مارکیٹنگ، وائٹل ٹی

گروپ ڈی (شیخوپورہ اور لاہور) احمد گلاس، اذلان ٹریڈرز، انکم ٹیکس، کنگز مین اکیڈمی، ریلویز، ساحر ایسوسی ایٹس اور صابر پولٹری۔