سابق آسٹریلوی ٹیسٹ کرکٹر باب کاوپر 84 سال کی عمر میں انتقال کر گئے ہیں۔
(ویب ڈیسک ) کرکٹ آسٹریلیا نے بیان میں کہا ہے کہ باب کاوپر ایک انتہائی باصلاحیت بائیں ہاتھ کے بلے باز تھے،انہیں انکی نفیس بیٹنگ، کریز پر صبر اور بڑے اسکور بنانے کی صلاحیت کے لیے یاد رکھا جائے گا۔
1966ء میں ایم سی جی میں انگلینڈ کےخلاف انہوں نے سب سے بڑی ٹیسٹ اننگز کھیلی تھی۔انہوں نے 307 رنز بنائے تھے جو انکی وجہ شہرت بنی۔
خیال رہے کہ باب کاوپر نے 27 ٹیسٹ میچز کھیلے جس میں انہوں نے 2061 رنز بنائے،اس میں 5 سنچریاں بھی شامل ہیں ۔انہوں نے فرسٹ کلاس کرکٹ میں وکٹوریا کی نمائندگی کرتے ہوئے 147 میچز میں 10 ہزار 595 رنز بنائے،
26 سنچریوں کے ساتھ ان کا بیٹنگ اوسط 53.78 رہا، باب کاوپر نے فرسٹ کلاس میں 183 اور ٹیسٹ کرکٹ میں 36 وکٹیں حاصل کیں۔
انہوں نے صرف 28 سال کی عمر میں مرچنٹ بینکر اور اسٹاک بروکر کی حیثیت سے اپناکیریئر بنانے کی وجہ سے کرکٹ چھوڑ دی تھی۔اس کے علاوہ وہ آئی سی سی میچ ریفری کے طور پر بھی خدمات انجام دیتے رہے۔
