غیر ملکی کھلاڑیوں نے پی ایس ایل کیلئے دوبارہ دستیابی ظاہر کر دی
ذرائع کے مطابق لوک ووڈ، میکس برانٹ، ٹام کوہلر کیڈمور، ڈیوڈ وارنر، نجیب اللہ زدران، میک ڈرموٹ اورکوشال مینڈس پی ایس ایل کے بقیہ میچز کھیلیں گے۔
ذرائع کے مطابق کولن منرو، رائلی روسو، سکندر رضا، سیم بلنگز کا بھی اپنی ٹیموں کو جوائن کرنے کا امکان ہے، دیگر غیرملکی کھلاڑی اپنے اپنے کرکٹ بورڈ سے این او سی کے منتظر ہیں۔
غیرملکی کرکٹ بورڈز نے کھلاڑیوں کو ابتدائی طور پر 18 مئی تک این او سی جاری کیے تھے، ذرائع کے مطابق فرنچائزز عدم دستیاب غیرملکی کھلاڑیوں کی جگہ منی ڈرافٹ میں شامل متبادل کرکٹر کا انتخاب کرسکتی ہیں۔
پاک بھارت کشیدگی کی وجہ سے پی ایس ایل کے بقیہ میچز کو ایک ہفتے آگے کرنا پڑا، ذرائع کا کہنا ہے کہ پی ایس ایل 10 میں شامل ٹیمیں آج رات سے اسلام آباد میں اکٹھی ہونا شروع ہو جائیں گی۔
ذرائع کا کہنا ہے کہ مقامی کھلاڑی آج سے اپنی اپنی ٹیموں کو جوائن کریں گے، پی ایس ایل 10 کے بقیہ آٹھ میچز کا آغاز 17 مئی کو راولپنڈی سے ہورہا ہے۔
پی سی بی کے مطابق 17 مئی بروز ہفتہ کو پشاور زلمی کا مقابلہ کراچی کنگز سے راولپنڈی کرکٹ اسٹیڈیم میں ہوگا۔اسی طرح 18 مئی کو راولپنڈی کرکٹ اسٹیڈیم ڈبل ہیڈر کی میزبانی کرے گا،
دوپہر میں ملتان سلطانز کا میچ کوئٹہ گلیڈی ایٹرز سے ہوگا اور شام کو پشاور زلمی اور لاہور قلندرز آمنے سامنے ہوں گے۔19 مئی کو اسلام آباد یونائیٹڈ اور کراچی کنگز ایونٹ کے آخری گروپ میچ میں مدمقابل ہوں گے
جس کے بعد پہلا کوالیفائر 21 مئی کو لاہور میں ہوگا جب کہ ایلیمینیٹر 1 اور کوالیفائر 2 بالترتیب 22 اور 23 مئی کو ہوں گے۔
پاکستان کرکٹ بورڈ کی جانب سے جاری بیان میں کہا گیا کہ دوپہر کا واحد میچ مقامی وقت کے مطابق سہ پہر 3 بجے شروع ہوگا جب کہ شام کے میچز مقررہ وقت کے مطابق شام 7.30 بجے ہوں گے۔
پی سی بی کے مطابق پاکستان سپر لیگ 10 کا فائنل قذافی اسٹیڈیم لاہور میں 25 مئی کو کھیلا جائے گا جب کہ ٹکٹوں سے متعلق تفصیلات جلد شیئر کی جائیں گی۔
