ارشد ندیم ایشین ایتھلیٹکس چیمپئن شپ میں شرکت کیلئے جنوبی کوریا روانہ
ویب ڈیسک ; پاکستان کے عالمی شہرت یافتہ جیولن تھرو کھلاڑی اور اولمپک گولڈ میڈلسٹ ارشد ندیم ایشین ایتھلیٹکس چیمپئن شپ میں شرکت کے لیے جنوبی کوریا روانہ ہو گئے ہیں۔
یہ ایونٹ ارشد ندیم کا پیرس اولمپکس کے بعد پہلا بین الاقوامی مقابلہ ہوگا، جس کے لیے نہ صرف پاکستانی شائقین، بلکہ عالمی کھیلوں کے حلقے بھی ان کی کارکردگی پر نظر رکھے ہوئے ہیں۔
ارشد ندیم جنوبی کوریا میں ہونے والی ایشین ایتھلیٹکس چیمپئن شپ میں پاکستان کی نمائندگی کریں گے، جہاں وہ جیولن تھرو کے مقابلے میں ایک مرتبہ پھر اپنی مہارت کا مظاہرہ کریں گے۔
ان کی شرکت سے نہ صرف پاکستان کے میڈل جیتنے کے امکانات بڑھ گئے ہیں، بلکہ یہ ایونٹ ان کی فٹنس اور فارم کے لیے بھی ایک بڑا امتحان ہوگا۔
یاد رہے کہ ارشد ندیم نے پیرس اولمپکس میں شاندار کارکردگی کے ذریعے پاکستان کے لیے گولڈ میڈل جیتا تھا، جس کے بعد وہ دنیا بھر میں ایک سپر اسٹار اتھلیٹ کے طور پر ابھرے ہیں۔
