انگلش بیٹر جو روٹ نے ٹیسٹ کرکٹ میں نیا ریکارڈ قائم کر دیا
ویب ڈیسک ; انگلینڈ کرکٹ ٹیم کے تجربہ کار بیٹر جو روٹ نے ٹیسٹ کرکٹ میں ایک نیا سنگ میل عبور کرتے ہوئے ایک اہم ریکارڈ قائم کیا۔
انگلینڈ کی جانب سے سب سے زیادہ ٹیسٹ رنز بنانے والے جو روٹ نے جمعرات کو زمبابوے کے خلاف کھیلے گئے ٹیسٹ میچ کے پہلے دن 28 واں رن مکمل کرکے ٹیسٹ کرکٹ میں 13 ہزار رنز کا سنگ میل عبور کیا۔
جو روٹ ٹیسٹ کرکٹ میں 13 ہزار رنز مکمل کرنے والے دنیا کے پانچویں اور انگلینڈ کے پہلے بیٹر بن گئے ہیں۔
انہوں نے نہ صرف یہ سنگ میل عبور کیا بلکہ ٹیسٹ کرکٹ میں تیز ترین 13 ہزار رنز بنانے والے بیٹر کا اعزاز بھی حاصل کر لیا۔ یہ کارنامہ انہوں نے 153 ویں ٹیسٹ میچ میں سرانجام دیا۔
اس سے قبل ٹیسٹ کرکٹ میں تیز ترین 13 ہزار رنز بنانے کا ریکارڈ جنوبی افریقی کرکٹر جیک کیلس کے پاس تھا، جنہوں نے یہ سنگ میل 159 ٹیسٹ میچز میں عبور کیا تھا۔
اس کے علاوہ، راہول ڈریوڈ نے 160، رکی پونٹنگ نے 162 اور سچن ٹنڈولکر نے 163 ٹیسٹ میچز میں 13 ہزار رنز مکمل کیے تھے۔
