اینجلو میتھیوز کا ٹیسٹ کرکٹ کو الوداع، بنگلادیش کے خلاف آخری میچ کھیلیں گے
ویب ڈیسک ; سری لنکا کے سینئر آل راؤنڈر اور سابق ٹیسٹ کپتان اینجلو میتھیوز نے بین الاقوامی کرکٹ کے طویل فارمیٹ سے کنارہ کشی کا فیصلہ کر لیا ہے۔
ان کا کہنا ہے کہ وہ بنگلادیش کے خلاف آئندہ ٹیسٹ میچ کے بعد کرکٹ کے اس باب کو بند کر دیں گے۔ یہ مقابلہ 17 جون سے سری لنکا کے شہر گال میں شروع ہوگا۔
میتھیوز نے تقریباً ڈیڑھ دہائی تک سری لنکن ٹیسٹ ٹیم کی نمائندگی کی ہے۔ انہوں نے سوشل میڈیا کے ذریعے اپنے ریٹائرمنٹ کے فیصلے کا اعلان کرتے ہوئے کہا کہ یہ لمحہ ان کے لیے جذباتی ہے، تاہم وقت آ گیا ہے کہ وہ نوجوان کھلاڑیوں کے لیے جگہ چھوڑیں۔
اینجلومیتھیوز نے 2009 میں پاکستان کے خلاف کولمبو میں اپنے ٹیسٹ کیریئر کا آغاز کیا تھا، اور دیکھتے ہی دیکھتے وہ سری لنکا کی ٹیم کا اہم ستون بن گئے۔ ان کے ہمہ جہت کھیل نے انہیں آل راؤنڈر کی حیثیت سے نمایاں کیا، جہاں وہ نہ صرف بلے بازی میں مہارت رکھتے تھے بلکہ ضرورت کے وقت گیند بازی سے بھی ٹیم کو سہارا دیتے۔
119 ٹیسٹ میچز میں میتھیوز نے سری لنکن ٹیم کی نمائندگی کی، جن میں انہوں نے کئی ناقابل فراموش اننگز کھیلیں۔ ان کا بیٹنگ اسٹرائیک، مزاحمتی کھیل کا انداز اور مشکل حالات میں سنبھل کر کھیلنے کی صلاحیت سری لنکن ٹیم کے لیے قیمتی اثاثہ بنی رہی۔
سری لنکن کرکٹ بورڈ نے انہیں 2013 میں ٹیم کی قیادت سونپی اور انہوں نے تقریباً 4 سال تک ٹیم کو لیڈ کیا۔ اس دوران انہیں کئی چیلنجز کا سامنا رہا، خصوصاً جب ٹیم تبدیلی کے عمل سے گزر رہی تھی۔ سینئر کھلاڑیوں کی ریٹائرمنٹ،
نوجوانوں کا انضمام اور مسلسل کارکردگی کا دباؤ ان کے لیے ایک بڑا امتحان تھا، مگر انہوں نے بردباری اور ذمہ داری کے ساتھ ان تمام چیلنجز کا سامنا کیا۔
ان کے دورِ قیادت میں سری لنکن ٹیم نے پاکستان، انگلینڈ اور آسٹریلیا جیسی بڑی ٹیموں کے خلاف یادگار کامیابیاں سمیٹیں، خاص طور پر 2014 میں انگلینڈ کے خلاف سیریز جیت نے ان کے کیریئر کو نئی بلندی دی۔
سفید بال کرکٹ کیلئے دستیابی برقرار ;
اگرچہ انہوں نے ٹیسٹ کرکٹ کو خیرباد کہہ دیا ہے، لیکن اینجلو میتھیوز نے یہ واضح کر دیا ہے کہ وہ ون ڈے اور ٹی ٹوئنٹی فارمیٹس کے لیے دستیاب رہیں گے، بشرطیکہ ٹیم کو ان کی ضرورت ہو۔ ان کا کہنا تھا کہ وہ ابھی بھی فٹ اور پرفارم کرنے کے لیے تیار ہیں اور اپنے تجربے سے ٹیم کو فائدہ پہنچانا چاہتے ہیں۔
سری لنکن کرکٹ بورڈ نے تصدیق کی ہے کہ میتھیوز کو بنگلادیش کے خلاف گال میں کھیلے جانے والے ٹیسٹ میچ کے لیے اسکواڈ میں شامل کیا گیا ہے۔ یہ میچ ان کے طویل اور قابل فخر ٹیسٹ کیریئر کا اختتامی باب ہوگا۔
سری لنکن شائقین اور کرکٹ مبصرین کا کہنا ہے کہ گال کا میدان اس عظیم کھلاڑی کو خراج تحسین پیش کرنے کے لیے بہترین مقام ہوگا، جہاں ان کے کیریئر کی کئی سنہری یادیں وابستہ ہیں۔
ان کے ریٹائرمنٹ کے اعلان کے بعد سوشل میڈیا پر موجودہ اور سابق کھلاڑیوں، کوچز اور مداحوں کی جانب سے خراج تحسین کے پیغامات کا سلسلہ شروع ہو گیا ہے۔
