پاکستان سپر لیگ فائنل کا دن پاک بحریہ کے نام، سمندری حدود کے محافظوں کو خراج تحسین
پاکستان سپر لیگ (پی ایس ایل) کا فائنل آج لاہور قلندرز اور کوئٹہ گلیڈی ایٹرز کے درمیان کھیلا جائےگا، فائنل میچ کے دوران پاکستان بحریہ کو خراج تحسین پیش کیا جائےگا۔
پاک بحریہ نے آپریشن ’بنیان مرصوص‘ کے دوران دشمن کی ہر چال کو ناکام بنایا، پاک نیوی کے جوانوں کو الرٹ دیکھ کر دشمن وار کرنے کی جرات نہ کر سکا، آج پی ایس ایل کے فائنل میں پاکستان بحریہ کے اس کردار کو سراہا جائےگا۔
اس موقع پر پاک بحریہ نے خصوصی ویڈیو بھی جاری کر دی، جس میں سربراہ پاک بحریہ نے پیغام دیا ہے کہ آئندہ بھی پاک بحریہ دشمن کے خلاف سیسہ پلائی دیوار ثابت ہوگی۔
میڈیا رپورٹس کے مطابق پاکستان سپر لیگ کے فائنل کی تقریب میں صدر مملکت آصف علی زرداری اور پاکستان بحریہ کے سربراہ ایڈمرل نوید اشرف شرکت کریں گے۔
واضح رہے کہ بھارت کی جانب سے پاکستان پر حملے کے جواب میں پاک افواج نے آپریشن بنیان مرصوص لانچ کرکے دشمن کو منہ توڑ جواب دیا، اس دوران جہاں بری فوج اور پاک فضائیہ ایکشن میں دکھائی دیں وہیں پاکستان بحریہ بھی فولادی دیوار ثابت ہوئی اور دشمن آگے بڑھنے کی جرات نہ کر سکا۔
انڈین میڈیا پر دعویٰ کیا جاتا رہا ہے کراچی میں بھارتی نیوی کی جانب سے حملہ کیا گیا ہے، لیکن حقیقت میں ایسا نہ ہوا۔ پاک نیوی کی سمندر میں یہ فولادی دیوار بھارت کے لیے ناقابل تسخیر رہی اور پاکستان کے تمام ساحلی شہر اور اثاثے محفوظ رہے۔
پاکستان نے آپریشن بنیان مرصوص کے دوران بھارت کے 6 جنگی جہاز تباہ کرنے کے ساتھ ساتھ دیگر فوجی تنصیبات کو بھی نشانہ بنایا، جن میں سب سے اہم ایس 400 دفاعی نظام بھی شامل ہے۔
دفاعی تجزیہ کاروں کے مطابق پاکستان کی مسلح افواج نے بھارت کو جس طرح جواب دیا ہے وہ اسے نسلوں تک یاد رہے گا، اور آئندہ کسی بھی جارحیت سے قبل 100 بار سوچے گا۔
دوسری جانب پی ایس ایل فائنل میں ابرارالحق کی پرفارمنس نے تقریب کو چار چاند لگا دیے
پاکستان سپر لیگ (پی ایس ایل) 10 کے فائنل میں معروف گلوکار ابرارالحق نے پرفارمنس کا مظاہرہ کرکے تقریب کو چار چاند لگا دیے۔
پی ایس ایل 10 کی فائنل تقریب کو پاک بحریہ کے نام کیا گیا ہے، جس میں سمندری حدود کے محافظوں کو بھرپور خراج تحسین پیش کیا گیا۔
اسٹیڈیم میں موجود شائقین کرکٹ پاکستان زندہ باد، پاکستان بحریہ زندہ باد کے نعرے لگا رہے تھے، جبکہ ملی نغمہ بھی پیش کیا گیا، جس پر شائقین کی جانب سے بھرپور داد دی گئی۔
نیول چیف ایڈمرل نوید اشرف، چیئرمین پی سی بی محسن نقوی، وفاقی وزیر خزانہ محمد اورنگزیب اور دیگر تقریب میں شریک ہوئے۔
یہ بھی پڑھیں پی ایس ایل فائنل میں پاک بحریہ کو خراج تحسین، قذافی اسٹیڈیم پاکستان زندہ باد کے نعروں سے گونج اٹھا شرکا کی جانب سے پاکستان زندہ باد، پاک بحریہ زندہ باد، افواج پاکستان زندہ باد کے نعرے لگائے
