راولپنڈی اسلام آباد اسپورٹس جرنلسٹس ایسوسی ایشن (RISJA) کے انتخابات، نئی باڈی کا قیام
راولپنڈی اسلام آباد اسپورٹس جرنلسٹس ایسوسی ایشن (RISJA) کے انتخابات، نئی باڈی کا قیام
اسلام آباد، 30 مئی: راولپنڈی اسلام آباد اسپورٹس جرنلسٹس ایسوسی ایشن (RISJA) کی جنرل کونسل کا اہم اجلاس جمعرات کو پاکستان اسپورٹس کمپلیکس اسلام آباد میں منعقد ہوا،
جس میں متفقہ طور پر نئی باڈی کے عہدیداران کا انتخاب کیا گیا۔ اجلاس میں جڑواں شہروں کے معروف اسپورٹس صحافیوں نے شرکت کی اور باہمی اتحاد و اتفاق کا مظاہرہ کرتے ہوئے قیادت کا انتخاب کیا۔
اس موقع پر جیو نیوز سے وابستہ سینئر اسپورٹس جرنلسٹ ایاز اکبر یوسفزئی کو چیئرمین منتخب کیا گیا جبکہ پبلک نیوز کے فیصل ساہی کو صدر کی ذمہ داریاں سونپی گئیں۔
ایسوسی ایٹڈ پریس آف پاکستان (اے پی پی) کے محمد شفیق راجہ کو سینئر نائب صدر منتخب کیا گیا، جبکہ روز نیوز کے نوید کھوکھر اور نیوز ون کی امبرین علی کو نائب صدور مقرر کیا گیا، جو میڈیا کی متوازن نمائندگی کا عکاس ہے۔
کے ٹو ٹی وی کے عارف خان کو سیکریٹری منتخب کیا گیا، اور اے بی این نیوز کے حسنین لیاقت کو فنانس سیکریٹری مقرر کیا گیا۔ پی ٹی وی نیوز کے احمر نجیب ستی کو انفارمیشن سیکریٹری کی ذمہ داری دی گئی۔
اے آر وائی نیوز کے محسن اعجاز کو چیئرمین ایگزیکٹو کمیٹی منتخب کیا گیا، جبکہ ایگزیکٹو کمیٹی کے ممبران میں عثمان خان (ڈیلی پیک پوائنٹ), جاوید خان (ریڈیو پاکستان), نثار خان (ڈیلی ٹائمز), اللہ نور وزیر (مشرق ٹی وی)، اور وفا عباس (سچ نیوز) شامل ہیں۔
اجلاس میں اسپورٹس جرنلسٹس کے حقوق، تربیت، اور فلاح و بہبود کے لیے مشترکہ جدوجہد کے عزم کا اعادہ کیا گیا۔ نئی قیادت نے ملک میں کھیلوں کے فروغ، خاص طور پر نظر انداز کیے گئے کھیلوں اور ابھرتے کھلاڑیوں کو میڈیا میں مؤثر انداز میں اجاگر کرنے کا عزم ظاہر کیا۔
