قومی ویمن بیس بال کی کھلاڑی ٹریننگ کیلئے جاپان روانہ
پاکستان ویمن بیس بال ٹیم کی دو کھلاڑی ٹریننگ کے لیے جاپان روانہ ہوگئیں، صائقہ ریاض اور مدیحہ رشید جاپان میں ایک ہفتے تک جاری رہنے والے بیس بال ٹریننگ میں شرکت کریں گی۔
صائقہ ریاض اور مدیحہ رشید کی اس ٹریننگ کا مقصد تجربہ کار کوچز کی نگرانی میں کھلاڑیوں کی صلاحیتوں کو بہتر بنانا ہے ۔
اس موقع پر صائقہ ریاض کا کہنا تھا کہ میں جاپان کے کوچز سے سیکھنے اور اپنا تجربہ ساتھی کھلاڑیوں کے ساتھ شیئر کرنے کے لیے پرجوش ہوں۔
مدیحہ رشید نے کہا کہ بطور پروفیشنل کھلاڑی میرا مقصد اپنی اسکلز کو بہتر کرکے پاکستان بیس بال کو فروغ دینا ہے ۔
صائقہ ریاض اور مدیحہ رشید بین الاقوامی سطح پر پاکستان کی نمائندگی کر چکی ہیں۔
