پریذیڈنٹ ٹرافی گریڈ ون : اذان اویس کی سیزن میں چھٹی فرسٹ کلاس سنچری
غنی گلاس کے رمیز جونیئر اور اوجی ڈی سی ایل کے مشتاق کلہوڑو کی چھ چھ وکٹیں۔
پریذیڈنٹ ٹرافی گریڈ ون : اذان اویس کی سیزن میں چھٹی فرسٹ کلاس سنچری۔
غنی گلاس کے رمیز جونیئر اور اوجی ڈی سی ایل کے مشتاق کلہوڑو کی چھ چھ وکٹیں۔
دفاعی چیمپئن ایس این جی پی ایل صرف 98 رنزپر آؤٹ ۔
کراچی 2 فروری ۔
پریذیڈنٹ ٹرافی گریڈ ون کرکٹ ٹورنامنٹ کے پانچویں راؤنڈ کے دوسرے دن کے کھیل کی خاص بات ایشال ایسوسی ایٹس کے اذان اویس کی او جی ڈی سی ایل کے خلاف سنچری تھی۔
یہ ان کی موجودہ سیزن میں چھٹی فرسٹ کلاس سنچری ہے۔
یوبی ایل اسپورٹس کمپلیکس میں ایشال ایسوسی ایٹس کی ٹیم او جی ڈی سی ایل کے 187 رنز کے جواب میں اپنی پہلی اننگز میں 325 رنز بناکر آؤٹ ہوگئی۔
اذان اویس نے سیزن میں اپنی شاندار فارم کو جاری رکھتے ہوئے 10 چوکوں کی مدد سے 100 رنز کی اننگز کھیلی۔ یہ اس ٹورنامنٹ میں ان کی دوسری اور سیزن میں چھٹی فرسٹ کلاس سنچری ہے۔ انہوں نے چار سنچریاں قائداعظم ٹرافی میں اسکور کی تھیں۔
پاکستان کے فرسٹ کلاس سیزن میں سب سے زیادہ 8 سنچریوں کا ریکارڈ آصف مجتبی کا قائم کردہ ہے۔
دانش عزیز نے8 چوکوں اور 3چھکوں کی مدد سے88 رنز ناٹ آؤٹ کی اننگز کھیلی ۔مشتاق کلہوڑو نے 88 رنز دے کر 6 وکٹیں حاصل کیں۔ کھیل ختم ہونے پر اوجی ڈی سی ایل نے دوسری اننگز میں بغیر کسی نقصان کے 140 رنز بنائے تھے۔
محسن رضا خان اور سمیر ثاقب بالترتیب 79 اور 48 رنز پر ناٹ آؤٹ ہیں۔ کے سی سی اے اسٹیڈیم میں پی ٹی وی کی ٹیم غنی گلاس کے 238 رنز کے جواب میں اپنی پہلی اننگز میں 325 رنز بناکر آؤٹ ہوگئی۔
محمد محسن 83 وقار حسین 73 اور محمد شہزاد 68 رنز کے ساتھ نمایاں رہے۔ رمیز جونیئر نے 107 رنز دے کر 6 وکٹیں حاصل کیں۔ غنی گلاس نے دوسری اننگز میں 2 وکٹوں پر 147 رنز بنائے تھے ۔محسن ریاض 62 اور کاشف علی 50 رنز کے ساتھ ناٹ آؤٹ ہیں۔
این بی پی اسپورٹس کمپلیکس میں واپڈا کی ٹیم دفاعی چیمپئن ایس این جی پی ایل کے خلاف پہلی اننگز میں 370 رنز بناکر آؤٹ ہوگئی ۔ عمران ڈوگر 110 محمد عمار 58 ایاز تصور 49 اور خالد عثمان 48 رنز کے ساتھ نمایاں رہے۔ محمد سلمان نے 82 رنز دے کر5 وکٹیں حاصل کیں۔
ایس این جی پی ایل کی ٹیم اپنی پہلی اننگز میں صرف 98 رنز پر آؤٹ ہوگئی۔محمد ذیشان نے 37 رنز دے کر 5 وکٹیں حاصل کیں۔ اسٹیٹ بینک اسٹیڈیم میں ہائر ایجوکیشن نے اسٹیٹ بینک کے خلاف اپنی دوسری اننگز میں 6 وکٹوں پر 218 رنز بنائے تھے۔
عبداللہ فضل نے 14 چوکوں کی مدد سے 95 رنز اسکور کیے۔ انہوں نے 61 رنز بنانے والے محسن خان کے ساتھ پہلی وکٹ کی شراکت میں107 رنز کا اضافہ کیا۔ محمد اسمعیل نے تین وکٹیں حاصل کیں۔
اس سے قبل اسٹیٹ بینک کی ٹیم پہلی اننگز میں 155 رنز بناکر آؤٹ ہوگئی تھی۔ رمیز عزیز45 رنز کے ساتھ ٹاپ اسکورر رہے۔ وسیم اکرم جونیئر نے 56 رنز دے کر 5 وکٹیں حاصل کیں۔
