نیشنل گیمز:سکھر اور لاڑکانہ ڈویژن کے اسکواش ٹرائلز کا اعلان
کراچی (سپورٹس لنک رپورٹ) سندھ اسکواش ایسوسی ایشن نے35ویں نیشنل گیمز میں شرکت کرنے والی سندھ کی مینز اور ویمنز ٹیموں کی تشکیل کے سلسلے میں سکھر اور لاڑکانہ ڈویژن کے ٹرائلز کا اعلان کر دیا ہے۔
سندھ اسکواش ایسوسی ایشن کے سیکریٹری جنرل نویدرحمان کے مطابق سکھراور لاڑکانہ ڈویژن کے تمام مینز اور ویمنز اسکواش کھلاڑیوں کو مطلع کیا جاتا ہے کہ اسکواش ٹرائلز منگل، 14 اکتوبر کوہمایوں جیم خانہ اسکواش کورٹس، سکھرمیں دوپہر 12بجے سے منعقد ہوں گے۔
شیڈول کے مطابق، ان ٹرائلز میں سے چارمرد اور 4 خواتین کھلاڑیوں کا انتخاب کیا جائے گا جو کراچی میں ہونے والے فائنل ٹرائلزمیں حصہ لیں گے، جہاں نیشنل گیمز کے لیے سندھ کی اسکواش ٹیموں کو حتمی شکل دی جائے گی۔
ٹرائلز میں شرکت کے خواہشمندسکھر اور لاڑکانہ کے کھلاڑیوں سے کہا گیا ہے کہ وہ اپنی انٹریزکی تصدیق 13 اکتوبر کی صبح 9 بجے تک نوید رحمان، سیکریٹری سندھ اسکواش ایسوسی ایشن اورنمائندہ سکھر ڈویژن ایم عتیق لودھی کے واٹس اپ نمبرز پر کردیں۔
یہ ٹرائلز سکھر ڈویژن اسکواش ایسوسی ایشن کی جانب سے سندھ اسکواش ایسوسی ایشن کے تعاون سے منعقد کیے جائیں گے۔ تمام بیرون شہر سے آنے والے کھلاڑیوں کو سفری الاؤنس/کرایہ سندھ اولمپک ایسوسی ایشن اور سندھ اسکواش ایسوسی ایشن کے قواعد کے مطابق دیا جائے گا۔
