پریمئر سپر لیگ سیزن II، پہلے رائونڈ کے مزید تین میچز کا فیصلہ

لاہور(سپورٹس لنک رپورٹ )کارپوریٹ سیکٹر کی کرکٹ ٹیموں کے درمیان جاری پریمئر سپر لیگ سیزن IIکے پہلے رائونڈ کے مزید تین میچز کا فیصلہ ہو گیا جس میں ڈیسکون ،تھری ڈی موڈلنگ اورآئی پی سی نے کامیابی حاصل کی۔ٹائون شپ وائٹس کرکٹ گرائونڈ میں کھیلے گئے میچ میں ڈیسکون نے یو بی ایس الیون کو 7وکٹوں سے شکست دی۔

یو بی ایس الیون نے پہلے کھیلتے ہوئے مقررہ اوورز میں 6 وکٹوں کے نقصان پر 130 رنز بنائے۔بلال انجم 43 جبکہ سمیم بٹ 41 رنز کے ساتھ نمایاں رہے ۔ڈیسکون کی ٹیم نے مطلوبہ ہدف 3 وکٹوں کے نقصان پر حاصل کر لیا۔فاتح ٹیم کے عمران منیر نے 51جبکہ جمیل خان نے 36 رنز بنائے۔عمران منیر کو شاندار بیٹنگ پر مین آف دی میچ کا ایوارڈ دیا گیا۔ریس کورس کرکٹ گرائونڈ میں کھیلے گئے پہلے میچ میں تھری ڈی موڈلنگ کی ٹیم نے جاز کو33 رنز سے شکست دیدی۔

تھری ڈی موڈلنگ نے پہلے کھیلتے ہوئے مقررہ اوورز میں 6 وکٹوں کے نقصان پر 151 رنز بنائے ۔جاز کی ٹیم نے مطلوبہ ہدف کے تعاقب میں 118 رنز پر ڈھیر ہوگئی۔تھری ڈی موڈلنگ کے مدثر احمد کو 6 رنز دے کر 5 کھلاڑیوں کو پویلین کی راہ دکھانے پر میچ کے بہترین کھلاڑی کا اعزاز دیا گیا۔ریس کورس کرکٹ گرائونڈ میں ہی کھیلے گئے دوسرے میچ میں آئی پی سی نے ہنڈا کی ٹیم کو5وکٹوں سے شکست دی۔

ہنڈا کی ٹیم نے نے پہلے کھیلتے ہوئے مقررہ اوورز میں161 رنز جوڑے جبکہ آئی پی سی نے مطلوبہ ہدف 5وکٹوں کے نقصان پر حاصل کیا۔آئی پی سی کے محمد منیب نے شاندار بالنگ کرتے ہوئے 5کھلاڑیوں کو آئوٹ کیا اور مین آف دی میچ کے حق دار قرار پائے ۔