تیسری میکڈونلڈز جونیئر اینڈ ویمنز اسکواش چیمپئن شپ کی کوارٹر فائنل لائن اپ مکمل

تیسری میکڈونلڈزجونیئر اینڈ ویمنز اسکواش چیمپئن شپ کی کوارٹر فائنل لائن اپ مکمل

بوائز میں سہیل عدنان،ارباب فہد،راحیل وکٹراور ویمنزمیں نمرہ بتول،

ماہ نور علی اورام کلثوم لاسٹ ایٹ میں شامل

کراچی (سپورٹس لنک رپورٹ)

سہیل عدنان،ارباب فہد،راحیل وکٹر، نمرہ بتول،ماہ نور علی اورام کلثوم نے تیسری میکڈونلڈ جونیئر اینڈ ویمنز اسکواش چیمپئن شپ کے کوارٹر فائنل میں رسائی حاصل کر لی۔

سندھ اسکواش ایسوسی ایشن کی میزبانی میں پی ایس ایف جہانگیر خان اسکواش کمپلیکس پاکستان اسپورٹس بورڈ کراچی سینٹر پر گزشتہ روز6لاکھ روپے مالیت کی انعامی رقم کی حامل چیمپئن شپ کے دوسرے راؤنڈ کے میچز کھیلے گئے۔

سندھ اسکواش ایسوسی ایشن کے سیکریٹری محمد عامرچیمپئن شپ کے آرگنائزنگ سیکریٹری ہیں۔دوسرے روز کے نتائج کے مطابق بوائز انڈر13کے دوسرے راؤنڈ میں پنجاب کے سہیل عدنان نے کے پی کے زوہیب خان کو 11-0،11-3 اور 113سے،

کے پی کے ارباب فہد نے پنجاب کے عبدالرحمان کو سخت مقابلے کے بعد 10-12،10-12،14-12،11-8اور11-7 سے جبکہ سندھ کے راحیل وکٹر نے پی اے ایف کے ایان محمود کو سنسنی خیز مقابلے کے بعد9-11،9-11،11-7،11-5 اور11-2سے شکست دے کر کوارٹر فائنل میں جگہ بنائی۔

دیگر میچوں میں کے پی کے دانش سکندر،پنجاب کے محمد حسن،کے پی کے فواد خان اور عزیز علی ناز کے ساتھ ساتھ پنجاب کے محمد جسیم بھی کوارٹر فائنل میں پہنچ گئے۔

ویمنز کے دوسرے راؤنڈ میں سندھ کی نمرہ بتول نے سخت مقابلے کے بعد سندھ ہی کی السا عمران کو 12-10،6-11،7-11،11-5اور11-4سے،

کے پی کی ماہ نور علی نے سندھ کی سیدہ سارہ علی کو 11-0،11-0اور11-3سے جبکہ کے پی کی ام کلثوم نے سندھ کی دامیہ خان کو 11-8،9-11،11-9اور11-7سے ہرا کر ٹاپ ایٹ مرحلے میں جگہ حاصل کی۔

کے پی کی زہرہ عبداللہ،واپڈا کی کومل خان،پنجاب کی رشنا محبوب،سندھ کی سمیرا شاہد اور انعم مصطفی بھی کوارٹر فائنل میں پہنچ گئیں۔بوائز انڈر9کے دوسرے راؤنڈ میں سندھ کے محمد فیض،

عبدالرافع،آبان خان،محمد مرسل اور محمد بن نسیم کے علاوہ عبید اللہ (کے پی)،محمد یوسف (کے پی)اور عاطف علی ناز (کے پی) بھی کامیابی سمیٹ کر کوارٹر فائنل میں نشست پکی کرنے میں کامیاب رہے۔

واضح رہے کہ چیمپئن شپ میں ملک بھر سے186کھلاڑی شرکت کر رہے ہیں۔