این بی پی 50ویں نیشنل اسنوکر چیمپئن شپ کا کراچی میں شاندار آغاز
کراچی: نیشنل بینک آف پاکستان (این بی پی) کی سرپرستی میں 50ویں نیشنل اسنوکر چیمپئن شپ کا باقاعدہ آغاز 13 جنوری کو این بی پی اسپورٹس کمپلیکس کراچی میں ہو گیا،
جو پاکستان میں اسنوکر کی تاریخ کا ایک اہم سنگِ میل ہے۔چیمپئن شپ کے آغاز کے موقع پر مسلم جمخانہ کراچی میں ایک پریس کانفرنس منعقد کی گئی، جس کی صدارت پاکستان بلیئرڈ اینڈ اسنوکر ایسوسی ایشن (PBSA) کے صدر عبدالقادر میمن نے کی۔
انہوں نے اسنوکر کے فروغ میں این بی پی کے مسلسل تعاون پر شکریہ ادا کرتے ہوئے کہا کہ نیشنل بینک آف پاکستان گزشتہ 16 برسوں سے نیشنل اسنوکر چیمپئن شپ کا مضبوط سہارا بنا ہوا ہے۔
پریس کانفرنس میں کھیل اور بینکاری شعبے کی نمایاں شخصیات نے شرکت کی، جن میں شیر محمد سینئر وائس پریزیڈنٹ و ہیڈ، این بی پی اسپورٹس وِنگ، محمد فرحان این بی پی اسپورٹس، نوید کپا
ڈیا ٹورنامنٹ ڈائریکٹر و سیکریٹری پی بی ایس اے، حسین ہارون چیف پیٹرن، مسلم جمخانہ، عالمگیر شیخ سابق صدر اور میر مبشر ابراہیم پیٹرن، مسلم جمخانہ شامل تھے۔
عبدالقادر میمن نے اپنے خطاب میں کہا کہ“گزشتہ سولہ سال سے نیشنل بینک آف پاکستان نیشنل اسنوکر چیمپئن شپ کا مستقل اسپانسر ہے، اور ہمیں خوشی ہے کہ اس سال بھی این بی پی ہمارے ساتھ موجود ہے۔”
چیمپئن شپ کے لیے کل انعامی رقم 16 لاکھ روپے مقرر کی گئی ہے۔ فاتح کھلاڑی کو 3 لاکھ 50 ہزار روپے، رنر اپ کو 2 لاکھ روپے، سیمی فائنلسٹس کو ڈیڑھ لاکھ روپے فی کس جبکہ کوارٹر فائنلسٹس کو ایک لاکھ 60 ہزار روپے دیے جائیں گے۔
اس سال ملک بھر سے 48 کھلاڑی چیمپئن شپ میں حصہ لے رہے ہیں، جنہیں 12 گروپس میں تقسیم کیا گیا ہے۔ ہر گروپ سے ٹاپ دو کھلاڑی ناک آؤٹ راؤنڈ کے لیے کوالیفائی کریں گے،
جبکہ فائنل میچ بیسٹ آف 11 فریمز پر مشتمل ہوگا۔ گزشتہ سال کے چیمپئن شاہد آفتاب اس سال اپنا ٹائٹل ڈیفینڈ کریں گے۔
اس موقع پر این بی پی کے سینئر وائس پریزیڈنٹ شیر محمد نے کہا کہ نیشنل بینک آف پاکستان نہ صرف اسنوکر بلکہ دیگر کھیلوں کے فروغ کے لیے بھی پرعزم ہے، اور پی بی ایس اے کے ساتھ شراکت داری قومی سطح پر ٹیلنٹ کو اجاگر کرنے کی عکاس ہے۔
چیمپئن شپ سے شائقین کی بڑی تعداد اور میڈیا کی بھرپور توجہ متوقع ہے، جہاں پاکستان کے صفِ اول کے اسنوکر کھلاڑی اس باوقار اعزاز کے لیے مدِ مقابل ہوں گے۔
