نیوزی لینڈ کیخلاف ابھیشیک شرما کی 14 گیندوں پر برق رفتار ففٹی
بھارت نے ابھیشیک شرما کی شاندار اور برق رفتار نصف سنچری کی بدولت تیسرے ٹی ٹوئنٹی انٹرنیشنل میں نیوزی لینڈ کو شکست دے کر پانچ میچوں کی سیریز میں 0-3 کی فیصلہ کن برتری حاصل کر لی۔
گوہاٹی میں کھیلے گئے میچ میں بھارت نے ہر شعبے میں عمدہ کارکردگی کا مظاہرہ کرتے ہوئے نیوزی لینڈ کو 8 وکٹوں سے ہرایا۔
نیوزی لینڈ نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 153 رنز بنائے، جس میں گلین فلپس 48 رنز کے ساتھ نمایاں رہے۔
بھارتی بولنگ اٹیک نے آغاز ہی سے کیویز پر دباؤ برقرار رکھا، خاص طور پر جسپریت بمراہ نمایاں نظر آئے، جنہوں نے 17 رنز دے کر 3 وکٹیں حاصل کیں۔
جواب میں بھارت نے 154 رنز کا ہدف محض 10 اوورز میں 2 وکٹوں کے نقصان پر حاصل کر لیا۔
بھارتی بلے بازوں نے جارحانہ انداز اپناتے ہوئے نیوزی لینڈ کے بولرز کو کوئی موقع نہ دیا۔ ابھیشیک شرما نے صرف 14 گیندوں پر ففٹی مکمل کی اور 20 گیندوں پر 68 رنز بنا کر ناقابلِ شکست رہے۔
کپتان سوریا کمار یادیو نے بھی شاندار بیٹنگ کرتے ہوئے 26 گیندوں پر 57 رنز بنائے اور ناٹ آؤٹ رہے۔
ابھیشیک شرما کی 14 گیندوں پر نصف سنچری بھارت کی جانب سے ٹی ٹوئنٹی انٹرنیشنل میں دوسری تیز ترین ففٹی ہے۔
