سوئنگ سلطان وسیم اکرم سیالکوٹ اسٹالینز کے صدر مقرر
پاکستان کرکٹ ٹیم کے مایہ ناز سابق کپتان وسیم اکرم کو پاکستان سپر لیگ (پی ایس ایل) کی فرنچائز سیالکوٹ اسٹالینز کا صدر مقرر کر دیا گیا۔
لاہور میں نجی ہوٹل میں الفا اوزی اسپورٹس کے زیر اہتمام ہونے والی تقریب میں وسیم اکرم کی بطور صدر نامزدگی کا باضابطہ اعلان کیا گیا۔
اسی موقعے پر سیالکوٹ اسٹیلینز کے آفیشل لوگو کی بھی پہلی مرتبہ رونمائی کی گئی جسے شرکا کی جانب سے بھرپور پذیرائی ملی۔
وسیم اکرم تقریب میں آن لائن شریک ہوئے اور ٹیم کے روشن مستقبل کے لیے نیک خواہشات کا اظہار کیا۔
انہوں نے اس عزم کا اعادہ کیا کہ وہ سیالکوٹ اسٹالینز کو ایک مضبوط، منظم اور کامیاب فرنچائز بنانے کے لیے اپنا تجربہ اور صلاحیتیں بروئے کار لائیں گے۔
تقریب میں اسٹیلینز کے ہیڈ کوچ ٹیم پین، ٹیم کے شریک مالکان حمزہ مجید اور محمد شاہد بھی موجود تھے۔
انہوں نے اس بات کا اعادہ کیا کہ سیالکوٹ اسٹالینز پی ایس ایل میں جدید رجحانات متعارف کرانے، کرکٹ کے فروغ اور کھیل کے معیار کو مزید بلند کرنے کے لیے مؤثر کردار ادا کرے گی۔
پی ایس ایل کے چیف ایگزیکٹو آفیسر سلمان نصیر بھی تقریب میں شرکت کی۔ اس دوران فرنچائز کے مستقبل کے منصوبوں پر بھی روشنی ڈالی۔
