کرکٹ میں بھی تبدیلی آگئی،ٹاس کیلئے سکے کی بجائے بیٹ

سڈنی (سپورٹس لنک رپورٹ)کرکٹ کے میدان میں ہر گزرتے دن کے ساتھ جدت آتی جارہی ہے اور جنٹل مین کے اس کھیل کو ہر پہلو سے تبدیل کرنے اور اسے دورِ حاضر کے تمام بڑے کھیلوں کے ہم پلہ بنانے کی کوششیں جاری ہیں۔ایک ایسی ہی کوشش آسٹریلیا کی عالمی شہر یافتہ ٹی ٹوئنٹی لیگ بگ بیش (بی بی ایل) میں دیکھی گئی۔بگ بیش لیگ کے اس میچ میں اننگز کا آغاز کرنے سے متعلق فیصلہ کرنے کے لیے ٹاس کے موقع پر سکے کی جگہ بیٹ اچھالنے کا طریقہ کار متعارف کروایا گیا۔

.@StrikersBBL win the bat flip and will bowl first #BBL08 pic.twitter.com/9MiFftCtNY

— KFC Big Bash League (@BBL) December 19, 2018

بگ بیش لیگ 18-2019 کے دوران برسبین ہیٹ اور ایڈیلیڈ اسٹرائیکرز کے درمیان کھیلے جانے والے میچ میں آسٹریلیا کے سابق ٹیسٹ کرکٹر میتھیو ہیڈن نے بلا اچھال کر ٹاس کی۔ٹاس کے لیے تیار کیے گئے اس خصوصی بلے کی دونوں اطراف ایک جیسی ہیں، جن پر ایک جانب فلیٹ (Flats) اور دوسری جانب روف (Roofs) لکھا ہوا ہے۔پہلی مرتبہ ہونے والے اس ٹاس کو ایڈیلیڈ اسٹرائیکرز کے کپتان کالن انگرام نے جیتا اور ٹاس جیت کر پہلے فیلڈنگ کرنے کا فیصلہ کیا۔میچ کے دوران پہلے بیٹنگ کرتے ہوئے برسبین ہیٹ 146 رنز بنانے کے بعد آل آؤٹ ہوگئی، جواب میں ایڈیلیڈ اسٹرائیکرز نے مطلوبہ ہدف باآسانی 20ویں اوور میں حاصل کرلیا۔ایڈیلیڈ اسٹرائیکرز کے راشد خان کو 4 اوورز میں 19 کے عوض 3 وکٹیں لینے پر میچ کا بہترین کھلاڑی قرار دیا گیا۔خیال رہے کہ رواں برس کے دوران یہ تجویز سامنے آئی تھی کہ ٹیسٹ کرکٹ سے ٹاس کو ختم کردیا جائے تاہم، انٹرنیشنل کرکٹ کونسل (آئی سی سی) کی کرکٹ کمیٹی نے ٹیسٹ کرکٹ میں ٹاس ختم کرنے کی تجویز کو مسترد کردیا تھا۔