14 ویں سی این ایس انٹرنیشنل اسکواش چیمپئن شپ کراچی میں اختتام پزیر

کراچی (سپورٹس لنک رپورٹ)14 ویں چیف آف دی نیول اسٹاف انٹرنیشنل اسکواش چیمپئن شپ پاکستان نیوی روشن خان جہانگیر خان اسکواش کمپلیکس ، کراچی میں منعقد ہوئی۔ مصر ، فرانس ، ہانگ کانگ ، کویت اور ملائشیا سے تعلق رکھنے والے 14غیر ملکی کھلاڑیوں اور10 قومی کھلاڑیوں نے ایک ہفتے پر محیط مقابلوں میں اپنی صلاحیتوں کا مظاہرہ کیا۔ کمانڈرپاکستان فلیٹ ، وائس ایڈمرل آصف خالق نے چیمپئین شپ کی اختتامی تقریب میں بطورمہمان خصوصی شرکت کی۔

ٹورنامنٹ کے ڈائریکٹر کموڈور حبیب الرحمٰن نے تقریب سے خطاب کرتے ہوئے حاظرین کو پاک بحریہ کی اسکواش سے طویل وابستگی کے حوالے سے آگاہ کیا۔ انہوں نے کہا کہ پاکستان بحریہ اپنی میراث کو زندہ رکھنے کے لئے پچھلی دو دہائیوں سے اسکواش چیمپئن شپ کا انعقادکر رہی ہے جو کہ پاک بحریہ کے کھیلوں کے فروغ کے لیے بالعموم اور بالخصوص اسکواش کے فروغ کے لیے عزم کا اظہار ہے۔ ٹورنامنٹ ڈائریکٹر نے مہمان خصوصی ، پروفیشنل اسکواش ایسوسی ایشن ، پاکستان اسکواش فیڈریشن اور تمام اسپانسرز اور شرکاءکا شکریہ ادا کیا۔

بعدازاں ، مہمان خصوصی،کمانڈر پاکستان فلیٹ وائس ایڈمرل آصف خالق نے چیمپئن شپ کے فاتح اور رنر اپ کو انعامات دیے۔مہمان خصوصی نے ان کی محنت اور قابل قدر کا میابی پر انہیں مبارکباد بھی پیش کی۔ ٹورنامنٹ کا فائنل میچ پاکستان کے طیب اسلم اور ملائیشیا کے ایوان یووین کےمابین کھیلا گیا۔ سنسنی خیز مقابلے کے بعد ملائیشیا کےکھلاڑی نے میچ جیت کر 14 ویں چیف آف دی نیول اسٹاف انٹرنیشنل اسکواش چیمپئن شپ کے فاتح کا اعزاز حاصل کیا۔اختتامی تقریب میں سول اور فوجی معززین ، سپانسرز اور کھیلوں سے تعلق رکھنے والے سینئر کھلاڑیوں نے بڑی تعداد میں شرکت کی۔