فاسٹ بائولر محمد عباس کواچھی کارکردگی کا صلہ مل گیا

اخترعلی خان
پاکستان کرکٹ بورڈ کی سلیکشن کمیٹی نے دورہ انگلینڈ اور ویسٹ انڈیز کیلئے ٹیسٹ ، ون ڈے اور ٹی ٹوئنٹی سکواڈز کا اعلان کردیا ہے، کچھ کھلاڑیوں کو ڈراپ کیا گیا ہے اور کچھ کو دوبارہ ٹیم کا حصہ بنایا گیاہے، چیف سلیکٹر محمد وسیم نے ٹیسٹ سکواڈ میں فاسٹ بائولر محمد عباس کو قومی سکواڈ کا حصہ بنایا ہے، محمد عباس کو جنوبی افریقہ اور زمبابوے کیخلاف ہوم سیریز سے قبل ٹیم سے ڈراپ کردیا گیا اور وجہ نیوزی لینڈ کے دورے کے دوران ان کی ناقص کارکردگی بتائی گئی تھی حالانکہ اس دورے کے دوران مزید کھلاڑیوں کی کارکردگی بھی ناقص رہی تھی مگر انہیں ہوم سیریز میں جنوبی افریقہ اور زمبابوے کیخلاف ٹیم کا حصہ بنایا گیا تھا بہرحال اس موضوع پر پھر بات ہو گی

محمد آصف جو اس وقت انگلش کائونٹی سیزن کھیلنے میں مصروف ہیں اور لیسٹر شائر کائونٹی کی نمائندگی کر رہے ہیں نے اب تک کھیلے گئے تمام کائونٹی میچوں میں شاندار کارکردگی کا مظاہرہ کیاہے اسی کارکردگی کو دیکھتے ہوئے محمد عباس کو سلیکٹرز نے دورہ انگلینڈ اور ویسٹ انڈیز کیلئے ٹیسٹ سکواڈ کا حصہ بنایا ہے، خود محمد وسیم کا کہنا ہے کہ جس طرح کی شاندار کارکردگی محمد عباس نے کائونٹی کرکٹ میں دکھائی ہے اس کے بعد ان کی ٹیم میں جگہ بنتی تھی، سلیکٹرز کے مطابق محمد عباس کیونکہ کائونٹی کرکٹ کھیل رہے ہیں اور انہیں انگلش کنڈیشنز کا تجربہ بھی زیادہ ہے اور ہم سمجھتے ہیں کہ ان کا یہ تجربہ ٹیم کیلئے اچھا ثابت ہوگا،فاسٹ بالر محمد عباس فرسٹ کلاس کرکٹ میں 500 سے زائد وکٹیں مکمل کرنے والے 21ویں پاکستانی اور مجموعی طور پر 51ویں گیند باز بن ہیں۔

محمد عباس اب تک 123 فرسٹ کلاس میچز میں 20.74 کی اوسط سے 512 وکٹیں حاصل کرچکے ہیں۔ انہوں نے 36 مرتبہ اننگز میں 5 یا اس سے زیادہ اور 11 مرتبہ میچ میں 10 یا اس سے زیادہ وکٹیں حاصل کر رکھی ہیں۔فرسٹ کلاس کرکٹ میں سب سے زیادہ وکٹیں لینے والے موجودہ پاکستانی وزیراعظم اور قومی کرکٹ ٹیم کے سابق کپتان عمران خان ہیں جنہوں نے 1 ہزار 287 وکٹیں حاصل کر رکھی ہیں۔ سابق کپتان اور سوئنگ کے سلطان فاسٹ بالر وسیم اکرم نے 1 ہزار 42، سابق فاسٹ بالر سرفراز نواز نے 1 ہزار 5، پاکستانی کرکٹ ٹیم کے موجودہ بالنگ کوچ وقار یونس نے 956، سابق قومی آل رانڈر یاسر عرفات نے 790 اور سابق فاسٹ بالر عبدالرف نے 695 وکٹیں اپنے نام کر رکھی ہیں۔محمد عباس کی فرسٹ کلاس کرکٹ میں کارکردگی کے بعد اب نوجوان فاسٹ بالر کی ٹیسٹ کرکٹ کی کارکردگی پر نظر ڈالتے ہیں۔ محمد عباس نے اب تک 23 ٹیسٹ میچوں کی 40 اننگز میں 4 ہزار 738 گیندوں پر 1 ہزار 916 رنز دے کر 84 وکٹیں حاصل کر رکھی ہیں۔فاسٹ بالر محمد عباس کی اننگز میں بہترین بالنگ 33 رنز کے عوض 5 وکٹیں ہیں جبکہ ایک میچ میں بہترین بالنگ 95 رنز کے عوض 10 وکٹیں ہیں۔ ان کی اوسط 22.80 اور اکانومی ریٹ 2.4 جبکہ اسٹرائیک ریٹ 56.40 ہے۔

محمد عباس 33 میچز میں 4 وکٹیں لینے کا کارنامہ 6 بار، 5 وکٹیں لینے کا کارنامہ 4 بار جبکہ 10 وکٹیں لینے کا کارنامہ ایک بار سرانجام دے چکے ہیں۔ یہ وہ اعداد و شمار ہیں جو اس بات کا ثبوت ہیں کہ محمد عباس ٹیسٹ کرکٹ کا ایک موثر ہتھیار ہیں۔محمد عباس جو اس وقت کائونٹی کرکٹ کھیل رہے ہیں کیلئے قومی ٹیسٹ سکواڈ میں واپسی کی خبر کسی خوشخبری سے کم نہیں ہے اور امید کی جا رہی ہے کہ محمد عباس جس طرح اپنی کائونٹی ٹیم کیلئے بہترین کارکردگی کا مظاہرہ کر رہے ہیں اسی کارکردگی کا تسلسل وہ قومی ٹیم کیلئے ٹیسٹ میچوں میں بھی جاری رکھیں گے، اس حوالے سے محمد عباس پرعزم ہیں کہ وہ اس موقع سے بھرپور فائدہ اٹھاتے ہوئے ٹیم میں اپنی جگہ کو پکا کرینگے، ان کا یہ بھی کہنا تھا کہ میں کبھی بھی ٹیم سے آئوٹ ہونے پر مایوس نہیں ہوتا اور میری نظر صرف اور صرف اچھی کارکردگی پر مرکوز ہوتی ہے، ایک سوال کے جواب میں ان کا کہنا تھا کہ کائونٹی کرکٹ کھیل کر تجربے میں اضافہ ہواہے اور یہ تجربہ پاکستان کی جانب سے ٹیسٹ کھیلتے وقت میرے کام آئے گا،

انہوں نے کہاکہ اس وقت مکمل فٹ بھی اور فارم میں بھی ہوں اور چاہتاہوں کہ پاکستان کیلئے اچھی سے اچھی کارکردگی کا مظاہرہ کروں۔ایک سوال کے جواب میں محمد عباس کا کہنا تھا کہ انگلش کنڈیشنز بلاشبہ بائولرزکو فائدہ پہنچاتی ہیں مگر اس کیلئے آپ کو اپنی لائن و لینتھ اور گیند کی رفتار کو ٹھیک رکھنا پڑتا ہے ورنہ یہی کنڈیشنز بلے باز کے حق میں چلی جاتی ہیں، محمد عباس کو ٹیم میں شامل کرکے بلاشبہ بورڈ نے ایک اچھا اقدام کیاہے اور اس سے محمد عباس کا ٹیلنٹ جو صرف کائونٹی کرکٹ تک محدود ہوتا نظر آرہا تھا اب اس کافائدہ قومی ٹیم کو بھی ہوگا اب یہ محمد عباس پر منحصر ہے کہ وہ اس موقع سے بھرپور فائدہ اٹھاتے ہوئے اچھی سے اچھی کارکردگی کا مظاہرہ کریں اور ٹیم میں اپنی جگہ کو مستقل بنیادوں پر پکاکرلیں، جس طرح کا اچھا فیصلہ کرکٹ بورڈ نے محمد عباس کے بارے میں کیا ہے امید کرتے ہیں کہ کرکٹ بورڈ محمد عامر جیسے ٹیلنٹ کو بھی بچانے کیلئے مثبت اقدامات کرے گا۔