کھلاڑیوں کو عالمی معیار کی سہولیات فراہم کرنے کیلئے بہترین انفراسٹرکچر بنارہے ہیں،ڈائریکٹر جنرل سپورٹس پنجاب جاوید چوہان

سپورٹس اینڈ یوتھ افیئرز ڈیپارٹمنٹ پنجاب اور پاکستان اولمپک ایسوسی ایشن کے باہمی تعاون سے نشتر پارک سپورٹس کمپلیکس کی ای لائبریری میںہونے والے ڈوپنگ سیمینار کے اختتامی روز سینئر ڈاکٹرز اور ماہرین نے کامن ویلتھ گیمز 2022ء میں شرکت کرنیوالے کھلاڑیوں کو لیکچرز دیئے، ڈائریکٹر جنرل سپورٹس پنجاب جاوید چوہان نے سیمینار سے خطاب کرتے ہوئے کہا ہے کہ تاریخ میں پہلی سپورٹس پالیسی بنائی ہے، تمام کھلاڑی اس کا ضرور مطالعہ کریں، اس میں کھلاڑیوں کی فلاح و بہبود کے بہت اہم نکات ہیں، انہوں نے مزید کہا کہ کھلاڑیوں کو عالمی معیار کی سہولیات فراہم کرنے کیلئے بہترین انفراسٹرکچر بنارہے ہیں، کھلاڑیوں کو ایلیٹ کلاس کی سپورٹس سہولیات کی فراہمی سے سپورٹس کو ترقی ملے گی، ان کا کہنا تھا کہ پاکستان نے ہاکی کے کھیل میں راج کیا ہے، ہاکی میں کھویا ہوا مقام دوبارہ حاصل کرنے کیلئے ہاکی کا ہائی پرفارمنس سنٹر بنا رہے ہیں جس میں دنیا کی جدید سہولیات فراہم کرینگے، کرکٹ کے عالمی معیار کے مطابق دو ہائی پرفارمنس سنٹرز بھی بنا رہے ہیں جن کا سول ورک مکمل کرلیا ہے

سکواش کمپلیکس 28 سال سے بند پڑا تھا اسے بحال کررہے ہیں، سیف گیمز 2023 سکواش کمپلیکس میں کرائیں گے، ڈائریکٹر جنرل سپورٹس پنجاب جاوید چوہان نے کہا ہے کہ کھلاڑیوں کو چوٹ لگنے سے مسائل پیدا ہوتے تھے، ان کو علاج میں سہولت نہیں ملتی تھی، کھلاڑیوں کو خوشخبری دے رہا ہوں کہ زخمی ہونے والے کھلاڑیوں کیلئے سپورٹس میڈیسن سنٹر قائم کیا جا رہا ہے ، برصغیر میں اس معیار کا سپورٹس میڈیسن سنٹر نہیں ہوگا، اس کے لئے سپورٹس انجریز کے ماہر ڈاکٹر ز کی خدمات حاصل کریں گے، سپورٹس میڈیسن سنٹر کا 14 اگست کو افتتاح کیا جائے گا، انہوں نے کہا ہے کہ کھلاڑیوں کی فلاح و بہبود کیلئے سپورٹس انڈوومنٹ فنڈ قائم کیا ہے، مالی مسائل کی وجہ سے کھلاڑی عالمی مقابلوں میں حصہ لینے سے رہ جاتے تھے، اب پنجاب کا کوئی کھلاڑی مالی مسائل کی وجہ سے عالمی مقابلوں میں شرکت سے محروم نہیں رہیگا

انہوں نے بتایا کہ پیرا اولمپکس میں پہلا گولڈ میڈل جیتنے والے حیدر علی کی بھی سپورٹس بورڈ پنجاب نے مدد کی تھی، حیدر علی ہمارے پاس آئے اور بتایا کہ ان کے پاس پیرا اولمپکس میں جانے کے لئے پیسے نہیں ہیں، سپورٹس بورڈ پنجاب نے فوری طور پر ان کو پیسے دیئے اور پھر حیدر علی پیرا اولمپکس میں گولڈ میڈل جیت کرآئے، ان کا کہنا تھا کہ کھلاڑیوں کیلئے انسورنش پالیسی بھی لارہے ہیں، پریمیم محکمہ سپورٹس پنجاب دیگا، گوجرانوالہ میں ریسلنگ کا جدید سنٹر بنا رہے ہیں

سالانہ سپورٹس کیلنڈر اپ ڈیٹ کردیا ہے، ٹیلنٹ ہنٹ، کیمپ اور ٹریننگ ترجیحات ہیں، ڈائریکٹر جنرل سپورٹس پنجاب جاوید چوہان نے مزید بتایا کہ اکتوبر میں سپورٹس ایکسپو بھی کرائیں گے، 200 کھلاڑیوں کے قیام کیلئے ہاسٹلز کو اپ گریڈ کررہے ہیں، سپورٹس پکچر وال بنارہے ہیں جس پر 200 فٹ اونچا پاکستان کا جھنڈا لہرائیں گے، سپورٹس پکچر وال پر عالمی ٹائیٹل جیتنے والے کھلاڑیوں کی تصاویر آویزاں کریں گے، ڈی جی سپورٹس پنجاب جاوید چوہان کے خطاب کے دوران اینیمیشن کے ذریعے تفصیلات دیکھائی گئیں۔

قوت مدافعت اور غذا کے ماہر ڈاکٹر اسد عباس نے کھلاڑیوں کو خوراک اور انجریزکے بارے میں آگاہی دی، انہوں نے بتایا کہ کھلاڑی اپنی طاقت بڑھانے کے مناسب خوراک لیں جس کے نقصانات نہ ہوں، کھلاڑیوں کو انجریز سے بچنا چاہئے اور اگر ان کو چوٹ لگ جائے تو انہیں اس کا علاج کرانا چاہئے، سیکرٹری ایجوکیشن کمیشن نیشنل اولمپک کمیٹی اداء جعفری نے ہراسمنٹ اور گڈ کنڈکٹ پر لیکچر دیا، ان کا کہنا تھا کہ کھلاڑیوں کو ایسے مواقع پر خود کو محدود رکھنا چاہیئے اور اگر کوئی واقعہ ہو جائے تو اس کیخلاف بھرپور آواز اٹھانی چاہئے، عالمی ایونٹس میں کھلاڑیوں کو اچھے رویہ اور کردار کا مظاہرہ کرنا چاہئے

سیکرٹری پاکستان اولمپک ایسوسی ایشن خالد محمود نے اپنے خطاب میں کہا ہے کہ کھلاڑیوں کو آگاہی کیلئے ڈوپنگ جیسے سیمینار منعقد کراتے رہیں گے، سیمینار کے انعقاد کیلئے تعاون کرنے پر ڈی جی سپورٹس پنجاب جاوید چوہان کے شکرگزار ہیں، ورلڈ ریسلنگ چیمپئن انعام بٹ اور نیشنل ٹیبل ٹینس چیمپئن ماحور شہزاد نے سیمینار کے انعقاد پر ڈی جی سپورٹس پنجاب جاوید چوہان کا شکریہ ادا کی کرتے ہوئے کہا ہے کہ کھیل کے ساتھ ساتھ اس طرح کی معلومات کے لئے سیمینار کھلاڑیوں کے علم میں اضافہ کرتے ہیں۔ پاکستان اولمپک ایسوسی ایشن آفیشل عابدقادری نے ڈائریکٹر جنرل سپورٹس پنجاب جاوید چوہان ، چیف سپورٹس کنسلٹنٹ سپورٹس بورڈ پنجاب محمد حفیظ بھٹی اور ڈائریکٹر یوتھ افیئرز سید عمیر حسن کو سوینئر دیئے۔