فٹ بال ورلڈ کپ 2022 کے 12 لاکھ سے زائد ٹکٹس فروخت

قطر میں ہونے والے فٹ بال ورلڈ کپ 2022 کے 12 لاکھ سے زائد ٹکٹس فروخت ہوگئے۔ رپورٹ کے مطابق فٹ بال کی عالمی گورننگ باڈی فیفا کا کہنا تھا کہ ٹکٹوں کی فروخت کے تازہ ترین مرحلے میں اب تک اپریل آخر میں 2 کروڑ 35 لاکھ ٹکٹوں کی درخواستیں موصول ہوئی تھیں۔فیفا کے مطابق یہ درخواستیں ارجنٹینا، برازیل، انگلینڈ، فرانس، میکسیکو، قطر، سعودی عرب اور امریکا سے موصول ہوئیں۔رپورٹ کے مطابق ورلڈ کپ کی ٹکٹس خریدنے کا اگلا موقع پہلے آئیے پہلے پائیے کی بنیاد پرملے گا لیکن تاحال اس کی تاریخ کا اعلان نہیں کیا گیا۔ورلڈ کپ کے کوالیفیکیشن میچز اب ختم ہوچکے ہیں اور تمام 32 ٹیموں کی تصدیق ہوچکی ہے۔میزبان قطر کو توقع ہے کہ ورلڈ کپ کے دوران 12 لاکھ سے زائد افراد ان کے ملک میں آئیں گے جو ملک کی مجموعی آبادی کا نصف ہے۔

قطر کے محکمہ سیاحت کے حالیہ اندازوں کے مطابق خلیجی ملک میں لاگت اور سہولیات کی دستیابی بنیادی توجہ کا حامل ہے کیونکہ قطر میں ہوٹلوں میں 30 ہزار سے کچھ زیادہ کمروں کی تعداد ہے، جن میں سے 8 فیصد فیفا کے مہمانوں کے لیے مختص ہیں۔ قابل رسائی کیٹگری میں فائیو اسٹارز ہوٹلز جیسی سہولیات پر ایک رات کے 80 ڈالر سے 100 ڈالر رینج ہے۔رپورٹ کے مطابق قطری حکومت نے فٹ بال کے شائقین کے لیے ہوٹلوں کے علاوہ ولاز اور اپارٹمنٹس میں 65 ہزار کمروں کا انتظام کیا ہے اور دوہا پورٹ میں 4 ہزار کمرے دو بحری جہازوں میں مختص کر لیا ہے۔خیال رہے کہ قطر میں فٹ بال ورلڈ کپ رواں برس نومبر میں شروع ہوگا اور 21 نومبر کو پہلا میچ میزبان قطر ارو ایکواڈور کے سرمیان البیت اسٹیڈیم میں کھیلا جائے گا۔ورلڈ کپ فٹ بال میں شرکت کرنے والی 32 ٹیموں کو 8 گروپس میں تقسیم کیا گیا ہے، گروپ میں شامل تمام 4 ٹیمیں آپس میں ایک،ایک میچ کھیلیں گی، 9 دسمبر کو کوارٹر فائنل مرحلے کا آغاز ہوگا جبکہ 13 اور 14 دسمبر کو دونوں سیمی فائنل کھیلے جائیں گے۔ورلڈ کپ کا فائنل 18 دسمبر کو لوسیل اسٹیڈیم میں کھیلا جائے گا۔