اولمپئین ارشد ندیم کہنی کی تکلیف میں مبتلا، آپریشن کیلئے لندن جائینگے

اولمپیئن ایتھلیٹ ارشد ندیم آئندہ ماہ کہنی کے آپریشن کے لیے لندن جائیں گے۔اولمپیئن جیولین تھرور ارشد ندیم نے لاہور میں ہونے والی نیشنل ایتھلیٹکس چیمپئن شپ میں شرکت کی اور توقع کے مطابق گولڈ میڈل جیتا، انہوں نے 81.21 میٹر کی تھرو کی۔کامن ویلتھ گیمز میں گولڈ میڈل جیتنے والے جیولین تھرور ارشد ندیم نے میڈیا کو بتایا کہ ابھی میں نے صرف 20 روز ٹریننگ کی ہے اور 81 میٹر سے زائد تھرو کرنے میں کامیاب ہوا، جس سے مجھے امید ہوئی ہے کہ میں جلد دوبارہ طویل تھرو کرنے میں کامیاب ہو جاں گا۔ارشد ندیم کا کہنا ہے کہ 2023 اور 2024 میں ہونے والے ایونٹس میں پاکستان کے لیے میڈلز جیتنا چاہتا ہوں، 2024 اولمپکس کے لیے کوالیفائی کرنا ٹارگٹ ہے۔انہوں نے کہا کہ مجھے ابھی کہنی کی وجہ سے تکلیف کا سامنا تو ہے، اس کا مجھے علاج کرانا پڑے گا، پاکستان ایتھلیٹکس فیڈریشن اس کے تمام انتظامات کر رہی ہے، میں جلد سرجری کے لیے انگلینڈ جاوں گا۔ان کا یہ بھی کہنا ہے کہ مجھے امید ہے کہ آئندہ ماہ علاج کے لیے انگلینڈ جاوں گا جس کے بعد بڑے ایونٹس کی بھرپور تیاری کر سکوں گا۔