آئی سی سی نے ٹیسٹ کھلاڑیوں کی نئی رینکنگ جاری کردی

انٹرنیشنل کرکٹ کونسل (آئی سی سی) کی جانب سے ٹیسٹ کھلاڑیوں کی نئی رینکنگ جاری کردی گئی ہے۔

انٹرنیشنل کرکٹ کونسل کی جانب سے جاری کی گئی نئی رینکنگ کے مطابق انگلینڈ کے بیٹر جوروٹ بدستور پہلی پوزیشن پر براجمان ہیں۔

آئی سی سی کی نئی رینکنگ کے مطابق نیوزی لینڈ کے بیٹر کین ولیمسن کی دوسری پوزیشن ہے، جبکہ بھارتی بیٹر یشسوی جیسوال 2 درجے ترقی کے بعد تیسری پوزیشن پر آگئے ہیں۔

بھارت کے اسٹار بیٹر ویرات کوہلی کی ٹیسٹ رینکنگ میں 6 درجے ترقی ہوئی ہے اور وہ چھٹے نمبر پر آگئے ہیں، جبکہ قومی کرکٹ ٹیم کے بیٹر محمد رضوان ایک درجہ ترقی پاکر ساتویں پوزیشن پر پہنچ گئے۔

قومی کرکٹ ٹیم کے بیٹر بابر اعظم کی ایک درجہ تنزلی ہوئی ہے اور وہ 12ویں نمبر پر چلے گئے ہیں۔

آئی سی سی کے مطابق بولرز کی رینکنگ میں بھارتی بولر جسپریت بمراہ بدستور پہلی پوزیشن پر موجود ہیں۔

اس کے علاوہ بھارتی بولر روی چندرن ایشون بھی بدستور دوسری پوزیشن پر موجود ہیں، جبکہ قومی ٹیم کے فاسٹ بولر شاہین شاہ آفریدی کی 4 درجے تنزلی ہوئی ہے اور وہ 14ویں نمبر پر چلے گئے ہیں۔

ٹیسٹ کرکٹ میں آل راؤنڈرز کی رینکنگ میں بھارت کے رویندرا جڈیجا کی بدستور پہلی پوزیشن ہے، اسی طرح روی چندرن ایشون کی دوسری پوزیشن ہے۔

آئی سی سی کے مطابق انگلینڈ کے آل راؤنڈر جوروٹ کی ایک درجہ بہتری ہوئی ہے اور وہ تیسری پوزیشن پر آگئے ہیں۔