جونیئر ایشیا کپ ہاکی ٹورنامنٹ کی تیاری کیلئے تربیتی کیمپ کراچی میں شروع

جونیئر ایشیا کپ ہاکی ٹورنامنٹ کی تیاری کےلیے قومی جونیئر ٹیم کا تربیتی کیمپ کراچی میں شروع ہوگیا۔

کراچی میں شروع ہونے والے ٹریننگ کیمپ کے پہلے دن کھلاڑیون نے صبح کے سیشن میں فزیکل فٹنس کے ساتھ مختلف ڈرلز پر کام کیا گیا، شام کےسیشن میں جونیئر ٹیم کے کھلاڑیوں کو تین گروپس میں تقسیم کرکے ٹریننگ کرائی گئی۔

مینجر اجمل خان لودھی کا کہنا ہے کہ ٹیم عمان میں 26 نومبر سے شیڈولڈ جونیئر ایشیا کپ میں حصہ لے گی۔

انہوں نے مزید کہا کہ کھلاڑیوں میں ٹیلنٹ تو بہت ہے، کیمپ میں ان کی خامیوں کو دور کرنے اور کھیل میں مزید بہتری لانے کی کوشش کریں گے۔

اس سے پہلے پاکستان ہاکی فیڈریشن (پی ایچ ایف) نے جونئیر ہاکی ایشیا کپ کی تیاری کے کیمپ کے لیے کھلاڑیوں اور ٹیم مینجمنٹ کا اعلان کردیا۔

پی ایچ ایف کے مطابق نیشنل جونیئر ہاکی چیمپئن شپ میں عمدہ کارکردگی دکھانے والے 67 نوجوان کھلاڑیوں کو کیمپ میں طلب کیا گیا ہے، تمام کھلاڑیوں کو کیمپ کمانڈنٹ انٹرنیشنل اجمل خان لودھی کو 3 نومبر کو کراچی میں رپورٹ کرنے کی ہدایت کی گئی ہے۔

ٹیم منیجمنٹ میں منیجر انٹرنیشنل اجمل خان لودھی، ہیڈ کوچ اولمپین قمر ابراہیم ۔کوچ اولمپین کامران اشرف،اسسٹنٹ کوچ انٹرنیشنل یاسر اسلام کو مقررکیا گیا ہے۔

ویڈیو اینالسٹ ابوزر امراؤ اور فزیو تھراپسٹ ڈاکٹر مبشر ہوں گے جبکہ جونئیر ایشیا کپ 26 نومبر سے مسقط عمان میں شروع ہوگا۔