پریذیڈنٹ ٹرافی گریڈ ون : عابدعلی کی ڈبل سنچری، اوپن جاکر آخر وقت تک ناٹ آؤٹ
اور 9 ویں وکٹ کی سنچری پارٹنرشپ ۔
کراچی ۔ پریذیڈنٹ ٹرافی گریڈ ون کے نویں اور آخری راؤنڈ کے دوسرے دن ایس این جی پی ایل کے عابد علی نے ایشال ایسوسی ایٹس کے خلاف شاندار ڈبل سنچری اسکور کی۔ انہوں نے بیٹ کیری بھی کیا اور محمد علی کے ساتھ نویں وکٹ کے لیے سنچری پارٹنرشپ بھی قائم کی۔
بدھ کے روز اسٹیٹ بینک اسٹیڈیم میں اوجی ڈی سی ایل کی ٹیم ہائر ایجوکیشن کے خلاف پہلی اننگز میں 431 رنز بناکر آؤٹ ہوگئی۔ گزشتہ روز سرور آفریدی اور راجہ حمزہ وحید نے سنچری اسکور کی تھی۔
فہد امین نے 112 رنز دے کر5 وکٹیں حاصل کیں۔ منصور علی نے 4 کھلاڑی آؤٹ کیے۔
ہائر ایجوکیشن نے کھیل ختم ہونے پر پہلی اننگز میں 6وکٹوں پر 231 رنز بنائے تھے۔محمد محسن خان 99 رنز بناکر آؤٹ ہوئے۔علی حمزہ وسیم نے 59 رنز اسکور کیے۔
مشتاق کلہوڑو اور سردار حسن رضا نے تین تین وکٹیں حاصل کیں۔
این بی پی اسپورٹس کمپلیکس میں واپڈا کی ٹیم غنی گلاس کے 286 رنز کے جواب میں اپنی پہلی اننگز میں 132 رنز بناکر آؤٹ ہوگئی۔ ایاز تصور46 رنز کے ساتھ ٹاپ اسکورر رہے۔ خرم شہزاد نے37 رنز دے کر4 وکٹیں حاصل کیں۔ عبید شاہ نے تین کھلاڑی آؤٹ کیے۔
غنی گلاس کی ٹیم اپنی دوسری اننگز میں 270 رنز بناکر آؤٹ ہوگئی ۔جنید علی نے 55 رنز اسکور کیے۔خالد عثمان نے 64 رنز دے کر4 وکٹیں حاصل کیں۔
واپڈا کو جیتنے کے لیے 425 رنز کا ہدف ملا ہے۔
کے سی سی اے اسٹیڈیم میں اسٹیٹ بینک نے کے آر ایل کے خلاف اپنی دوسری اننگز میں 3 وکٹوں پر 364 رنز بنائے تھے۔عاقب شاہ 12 چوکوں کی مدد سے 122 رنز بناکر ناٹ آؤٹ ہیں۔
عرفان خان نیازی 4 چھکوں اور5 چوکوں کی مدد سے 95 رنز بناکر کریز پر موجود ہیں ۔یہ دونوں چوتھی وکٹ کی شراکت میں 183 رنز کا اضافہ کرچکے ہیں ۔عمرامین نے 61 رنز اسکور کیے۔
یوبی ایل اسپورٹس کمپلیکس میں ایس این جی پی ایل کی ٹیم ایشال ایسوسی ایٹس کے خلاف پہلی اننگز میں 346 رنز بناکر آؤٹ ہوگئی۔ عابدعلی شاندار بیٹنگ کرتے ہوئے 34 چوکوں اور ایک چھکے کی مدد سے 225 رنز اسکور کیے
اور آؤٹ نہیں ہوئے ۔ انہوں نے بیٹ کیری بھی کیا اس کے علاوہ انہوں نے محمد علی کے ساتھ نویں وکٹ کی شراکت میں 128 رنز کا اضافہ بھی کیا۔
اسد رضانے 88 رنز دے کر 4 وکٹیں حاصل کیں۔ ایشال ایسوسی ایٹس نے اپنی پہلی اننگز میں 5 وکٹوں پر116 رنز بنائے تھے۔عبدالرحمن نے 65 رنز اسکور کیے۔
