چیمپئنز ٹرافی میں شائقین کی توقعات پر پورا نہیں اتر سکے: محمد رضوان
راولپنڈی: قومی کرکٹ ٹیم کے کپتان محمد رضوان نے کہا ہے کہ اس بات کو تسلیم کرتے ہیں کہ شائقین کی توقعات پر پورا نہیں اترے، ٹیم کی پرفارمینس سے قوم کو مایوسی ہوئی۔
راولپنڈی میں قومی کرکٹ ٹیم کے کپتان محمد رضوان کہا کہ جو لڑکے اچھا پرفارم کررہے تھے، انہوں نے آسٹریلیا اور ساؤتھ افریقہ کے خلاف اچھا پرفارم کیا، اچانک انجریز ہوگئیں جس سے ٹیم کا کمبی نیشن متاثر ہوا۔
انہوں نے کہا کہ چیمپئنزٹرافی میں ہم اچھے رزلٹ حاصل نہ کر سکے، آخری میچ میں فتح حاصل کرنا چاہتے تھے لیکن بارش ہوگئی، بدقسمتی سے چیمپئنزٹرافی میں ٹیم کی پرفارمنس سے قوم کو مایوسی ہوئی، ہم قبول کرتے ہیں کہ شائقین کی توقعات پر پورا نہیں اترسکے۔
یاد رہے کہ آئی سی سی چیمپئنز ٹرافی 2025 کا گروپ لیول کا 9واں میچ آج پاکستان اور بنگلادیش کے درمیان راولپنڈی کرکٹ سٹیڈیم میں کھیلا جانا تھا، تاہم بارش کے باعث میچ منسوخ کردیا گیا ہے۔
پاکستان اور بنگلادیش گروپ اے میں شامل ہیں اور دونوں اپنے اپنے پہلے میچز ہار چکے تھے، گروپ سے بھارت اور نیوزی لینڈ سیمی فائنل کے لیے کوالیفائی کرچکے ہیں۔
