شاہد آفریدی کی قیادت میں “پاکستان زندہ باد” ریلی کا انعقاد کیا گیا
بھارتی جارحیت کا منہ توڑ جواب دینے اور آپریشن بُنیان مّرصُوص کی کامیابی پر آج ملک بھر میں یومِ تشکر منایا جارہا ہے، پاکستان میں یوم تشکر کے موقع پر بچوں سمیت شہری کے جذبے بلند ہیں، ہر شہری کے لبوں پر صرف پاک فوج زندہ باد کا نعرہ ہے۔
پاکستان کرکٹ ٹیم کے سابق کپتان شاہد خان آفریدی نے کراچی کے ساحلی علاقے سی ویو پر “پاکستان زندہ باد” ریلی کی قیادت کرتے ہوئے بھارت کے وزیراعظم نریندرمودی کوشدید تنقید کا نشانہ بنایا۔
ریلی میں ہزاروں افراد نے شرکت کی اور پاک فوج کے حق میں نعرے بلند کیے، آفریدی نے کہا کہ ہم خطے میں امن کے لیے نکلے ہیں لیکن بھارتی جارحیت نے صورتحال کو سنگین بنا دیا ہے۔
انہوں نے کہا کہ پاک فوج نے دشمن کو مؤثراورواضح جواب دیا اوریہ ثابت کیا کہ پاکستان کا دفاع ناقابلِ تسخیر ہے، بھارت میں اقلیتیں محفوظ نہیں، سکھ، مسلمان اوردیگرمظلوم کمیونٹیز مودی سرکارکے ظلم کا شکار ہیں۔
انہوں نے کہا کہ بھارتی میڈیا کو “50 فیصد بالی ووڈ اور 50 فیصد کارٹون نیٹ ورک” قراردے دیا ، نریندر مودی کا جنگی جنون بھارت کو بند گلی میں دھکیل چکا ہے، پاکستان نے جنگ میں بچوں کو نشانہ نہیں بنایا، جبکہ بھارت نے معصوم بچوں کو شہید کرکےعالمی ضمیرکوجھنجھوڑا ہے۔
اس موقع پر عام شہریوں نے پاک افواج پر اعتماد کا اظہار کرتے ہوئے کہا کہ بھارت مسلسل حملے کر رہا تھا۔ جب پاک افواج نے جواب دیا تو بھارت خاموش ہوگیا، پاک افواج کا بھارت کو منہ توڑ جواب نے بھارتی حکومت کو دنیا کے سامنے منہ دیکھانے کے قابل نہ چھوڑا۔
شہریوں کا کہنا تھا کہ جب بھی بھارت میں عام انتخابات ہوتے ہیں اس سے پہلے مودی حکومت کچھ نہ کجھ دہشتگردی کرا کر الزام پاکستان پر لگا دیتی ہے لیکن اب پاکستان کے جواب کے بعد مودی دوبارہ ایسی غلطی کا سوچے گا بھی نہیں۔
بھارت کو اب اندازہ ہو گیا ہے کہ پاکستان سے الجھنا مہنگا پڑے گا۔ انہوں نے شہداء کو خراجِ عقیدت پیش کرتے ہوئے کہا کہ ہمارا وطن بے مثال ہے اوراس کا دفاع ہم سب پرفرض ہے۔
