پریذیڈنٹ ٹرافی : کے آر ایل نے دفاعی چیمپئن ایس این جی پی ایل کو 4 وکٹوں سے ہرادیا
اسٹیٹ بینک کی واپڈا کے خلاف ایک وکٹ سے کامیابی
پریذیڈنٹ ٹرافی : کے آر ایل نے دفاعی چیمپئن ایس این جی پی ایل کو 4 وکٹوں سے ہرادیا۔
اویس ظفر کے ناقابل شکست71 رنز
اسٹیٹ بینک کی واپڈا کے خلاف ایک وکٹ سے کامیابی
کراچی 29 جنوری ۔
پریذیڈنٹ ٹرافی گریڈ ون کرکٹ ٹورنامنٹ کے چوتھے راؤنڈ میں کے آر ایل نے دفاعی چیمپئن ایس این جی پی ایل کو4 وکٹوں سے شکست دیدی۔
ایس این جی پی ایل کی چار میچوں میں یہ تیسری شکست اور کے آر ایل کی پہلی کامیابی ہے۔
اسٹیٹ بینک نے واپڈا کے خلاف میچ دلچسپ مقابلے کے بعد ایک وکٹ سے جیت لیا۔
اسٹیٹ بینک اسٹیڈیم میں کے آر ایل کو ایس این جی پی ایل کے خلاف جیتنے کے لیے 207 رنز کا ہدف ملا تھا۔ آخری دن اس نے 81 رنز 3 کھلاڑی آؤٹ پر اپنی دوسری اننگز شروع کی اور چھ وکٹوں کے نقصان پر مطلوبہ اسکور پورا کرلیا۔
اویس ظفر نے7 چوکوں اور3 چھکوں کی مدد سے 71 رنز اسکور کیے اور آؤٹ نہیں ہوئے۔انہوں نے مرزا سعد بیگ کے ساتھ چھٹی وکٹ کی شراکت میں 57 رنز کا اضافہ کیا۔ سعد بیگ نے دو چوکوں اور ایک چھکے کی مدد سے 17 رنز بنائے۔ شاہد عزیز تین چوکوں کی مدد سے13 رنز بناکر ناٹ آؤٹ رہے۔
کے سی سی اے اسٹیڈیم میں اسٹیٹ بینک کو واپڈا کے خلاف جیتنے کے لیے145 رنز کا ہدف ملا تھا لیکن کھانے کے وقفے تک اس کی پانچ وکٹیں67 رنز پرگرچکی تھیں۔
عمرامین اور کاشف بھٹی کی کوششیں ٹیم کو جیت کے قریب لے آئیں ۔کاشف بھٹی نے 42 رنزکی اننگز کھیلی جس میں 4 چوکے اور2 چھکے شامل تھے۔انہوں نے 26 رنز کی اہم اننگز کھیلنے والے عمر امین کے ساتھ ساتویں وکٹ کی شراکت میں32 رنز کااضافہ کیا۔
محمد اسمعیل نے 2 چوکوں کی مدد سے9 رنز بناکر اپنی ٹیم کو جیت سے ہمکنار کردیا۔
نقیب اللہ نے 67 رنز دے کر4 وکٹیں حاصل کیں ۔ علی رضا نے تین وکٹیں حاصل کیں۔
پریذیڈنٹ ٹرافی کا پانچواں راؤنڈ یکم مارچ سے شروع ہوگا۔
