جے-60 بارڈ فاؤنڈیشن جونیئر ورلڈ ٹینس چیمپئن شپ اختتام پذیر
حسن عثمانی اور حذیق عاصم نے بوائز ڈبلز کا ٹائٹل جیت لیا، روسی جوڑی گرلز ڈبلز کی چیمپئن
اسلام آباد: پاکستان ٹینس فیڈریشن (PTF) ٹینس کمپلیکس میں منعقدہ J-60 بارڈ فاؤنڈیشن جونیئر ورلڈ ٹینس چیمپئن شپ اسلام آباد 2026 آج کامیابی کے ساتھ اختتام پذیر ہو گئی۔
چیمپئن شپ کے آخری روز بوائز اور گرلز ڈبلز کے دلچسپ فائنلز کھیلے گئے، جن کے ساتھ اس بین الاقوامی جونیئر ٹینس ایونٹ کا کامیاب اختتام ہوا۔
بوائز ڈبلز کے فائنل میں غیر سیڈڈ پاکستانی جوڑی محمد حسن عثمانی اور محمد حذیق عاصم نے شاندار کھیل کا مظاہرہ کرتے ہوئے ٹاپ سیڈڈ جوڑی حمزہ رومان اور احتشام ہمایوں کو 6-2، 4-6 اور 10-6 سے شکست دے کر چیمپئن شپ کا ٹائٹل اپنے نام کر لیا۔
گرلز ڈبلز کے فائنل میں روس کی جوڑی واروارا روبٹسوا اور ایولینا ڈزیپا نے چین کی جوڑی می می ہوئی اور یجیا وانگ کو 6-0، 2-6 اور 10-5 سے شکست دے کر گرلز ڈبلز کا ٹائٹل جیت لیا۔
اس چیمپئن شپ میں مجموعی طور پر 58 باصلاحیت جونیئر کھلاڑیوں نے حصہ لیا، جن میں 36 بوائز اور 22 گرلز شامل تھیں۔ ان کھلاڑیوں کا تعلق 14 ممالک روس، ہانگ کانگ، چین، تھائی لینڈ، قازقستان، بنگلہ دیش، سری لنکا، سربیا، آسٹریلیا، اسپین، کینیڈا، بیلاروس، سویڈن اور پاکستان سے تھا۔
یہ ٹورنامنٹ بارڈ فاؤنڈیشن کے تعاون سے منعقد کیا گیا، جس کی فراخدلانہ معاونت پاکستان میں جونیئر ٹینس کے فروغ اور ترقی میں اہم کردار ادا کر رہی ہے۔
اس تعاون کے ذریعے نوجوان کھلاڑیوں کو بین الاقوامی سطح پر اپنی صلاحیتوں کے اظہار اور قیمتی تجربہ حاصل کرنے کے مواقع بھی فراہم کیے جا رہے ہیں۔
اختتامی تقریب میں مس آمنہ رحمان، ایگزیکٹو ڈائریکٹر بارڈ فاؤنڈیشن نے بطور مہمانِ خصوصی شرکت کی، جبکہ جناب طفیل چیمہ، سیکرٹری جنرل اسلام آباد ٹینس ایسوسی ایشن مہمانِ اعزاز تھے۔
اس موقع پر جناب اعصام الحق قریشی، صدر پاکستان ٹینس فیڈریشن، اور کرنل ضیاء الدین طفیل، سیکرٹری جنرل پاکستان ٹینس فیڈریشن بھی موجود تھے، جنہوں نے فاتح کھلاڑیوں اور رنرز اَپ میں ٹرافیاں تقسیم کیں۔
اختتامی تقریب میں کرنل گل رحمان، ڈائریکٹر پی ٹی ایف؛ جناب ایم عارف قریشی، ورلڈ ٹینس وائٹ بیج ریفری؛ سفارتی برادری کے نمائندگان سمیت بڑی تعداد میں ٹینس کھلاڑیوں، والدین، کوچز اور شائقین نے شرکت کی۔
اس موقع پر جناب اعصام الحق قریشی، صدر پاکستان ٹینس فیڈریشن نے تمام فاتح کھلاڑیوں اور رنرز اَپ کو ان کی شاندار کارکردگی پر مبارکباد دی اور شریک کھلاڑیوں، کوچز اور ٹورنامنٹ آفیشلز کی کاوشوں کو سراہا۔
انہوں نے جونیئر ٹینس کے فروغ اور ترقی کے لیے مسلسل تعاون پر بارڈ فاؤنڈیشن کا خصوصی شکریہ ادا کیا۔
انہوں نے اس بات پر زور دیا کہ پاکستان میں بین الاقوامی جونیئر ٹینس ٹورنامنٹس کا انعقاد نوجوان پاکستانی کھلاڑیوں کو اپنے ملک میں بین الاقوامی کھلاڑیوں کے ساتھ مقابلہ کرنے، تجربہ حاصل کرنے اور اپنی صلاحیتوں کو نکھارنے کے بہترین مواقع فراہم کرتا ہے۔
یہ امر بھی قابلِ ذکر ہے کہ J-30 پی پی ایل پاکستان ورلڈ جونیئر ٹینس ٹورنامنٹ کا بھی آج پی ٹی ایف ٹینس کمپلیکس میں آغاز ہو گیا ہے،
جس کے مین ڈرا کے مقابلے کل سے شروع ہوں گے۔ اس طرح اسلام آباد میں بین الاقوامی جونیئر ٹینس مقابلوں کا سلسلہ جاری رہے گا۔
