انڈر 16 کرکٹ ٹورنامنٹ‘ ناردرن نے سدرن پنجاب کو شکست دے دی

اسلام آباد(سپورٹس لنک رپورٹ) پاکستان کرکٹ بورڈ کے زیر اہتمام جاری انڈر 16 کرکٹ ٹورنامنٹ میں ناردرن نے سدرن پنجاب کو شکست دے دی۔ گذشتہ روز اقبال اسٹیڈیم فیصل آباد میں کھیلے گئے میچ میں ناردرن نے سدرن پنجاب کو 8 وکٹوں سے شکست دے دی۔ بارش کے باعث دونوں ٹیموں کے درمیان میچ، بیس بیس اوورز تک محدود کردیا گیا تھا۔

سدرن پنجاب کی ٹیم نے پہلے کھیلتے ہوئے مقررہ 20 اوورز میں 9 وکٹوں کے نقصان پر 109 رنز بنائے۔ ناردرن کے اسپنر محمد ابراہیم نے 3 وکٹیں حاصل کیں۔ جواب میں ناردرن نے مطلوبہ ہدف 7 گیندیں قبل حاصل کرلیا۔ ناردرن کی جانب سے مڈل آرڈر بیٹسمین محمد سعد نے 52 رنز کی ناقابل شکست اننگز کھیل کر ٹیم کی فتح میں کلیدی کردار ادا کیا۔

دوسری جانب پی سی بی پیپسی قومی انڈر 16 ایک روزہ کرکٹ ٹورنامنٹ میں بلوچستان اور خیبرپختونخوا کے درمیان میچ بارش کی نذر ہوگیا۔ بوہرانوالی گراؤنڈ فیصل آباد کی آؤٹ فیلڈ گیلی ہونے کے باعث میچ کا آغاز ممکن نہ ہوسکا۔