رمضان سپورٹس فیسٹیول،باسکٹ بال ایونٹ میں ایس اے جی کی جیت

سی ڈی اے اور ایم ای آئی رمضان سپورٹس فیسٹیول کے باسکٹ بال کے ایونٹ میں ایس اے جی نے یونائیٹڈ کنگز کو شکست دے کر فتح حاصل کر لی ہے۔تفصیلات کے مطابق ایونٹ کا فائنل میچ یونائیٹڈ کنگز اور ایس اے جی ٹیموں کے درمیان کھیلا گیا جس میں ایس اے جی نے 27 کے مقابلے میں 40 پوائنٹس سے کامیابی حاصل کی۔ فاتح ٹیم ایس اے جی کے جنید اور اورنگزیب نے بالترتیب 14 اور 8 پوائنٹس حاصل کئے۔جبکہ دوسری پوزیشن پر آنے والی ٹیم یونائیٹڈ کنگز کے عمران اور عمر نے بالترتیب 8 اور 6 پوائنٹس حاصل کئے۔فائنل سے قبل دونوں سیمی فائنل مقابلے منعقد ہوئے۔پہلے سیمی فائنل میں ایس اے جی نے بلز کو 39 کے مقابلے میں 50 پوائنٹس سے جبکہ دوسرے سیمی فائنل میں یونائیٹڈ کنگز نے ریپٹرز کو 40 کے مقابلے میں 46 پوائنٹس سے کامیابی حاصل کرکے فائنل کے لئے کوالیفائی کیا۔