چھٹا ون ڈے : ۔ زمبابوے سلیکٹ کی پاکستان شاہینز کے خلاف 32 رنز سے کامیابی

 

 

 

چھٹا ون ڈے : ۔ زمبابوے سلیکٹ کی پاکستان شاہینز کے خلاف 32 رنز سے کامیابی، سیریز بھی جیت لی، کریگ ارون اور مبصر خان کی سنچریاں ۔

ہرارے، 27 مئی 2023:

 

زمبابوے سلیکٹ نے پاکستان شاہینز کے خلاف ون ڈے میچوں کی سیریز چار دو سے جیت لی۔ ہفتے کے روز ہرارے میں کھیلے گئے چھٹے اور آخری ون ڈے میچ میں میزبان ٹیم نے 32 رنز سے کامیابی حاصل کرلی جس کی خاص بات کریگ ارون کی 195 رنز کی شاندار اننگز تھی۔

 

پاکستان شاہینز کی طرف سے مبصر خان نے بھی جارحانہ انداز میں بیٹنگ کرتے ہوئے سنچری اسکور کی۔

پاکستان شاہینز کے کپتان کامران غلام نے ٹاس جیت کر زمبابوے سلیکٹ کو پہلے بیٹنگ دی جس نے مقررہ پچاس اوورز میں 7 وکٹوں پر 385رنز بنائے جو اس سیریز میں بننے والا سب سے بڑا اسکور ہے۔

جواب میں پاکستان شاہینز 49 اعشاریہ 2 اوورز میں 353 رنز بناکر آؤٹ ہوگئی۔

پاکستان شاہینز کو میچ کے پہلے ہی اوور میں جوئے لارڈ گمبی کی وکٹ مل گئی تھی جو بغیر کوئی رن بنائے محمد علی کی گیند پر کامران غلام کے ہاتھوں کیچ ہوئے لیکن اس کے بعد اینوسینٹ کایا اور کریگ ارون نے دوسری وکٹ کی شراکت میں 187 رنز کا اضافہ کرڈالا۔ یہ شراکت بھی محمد علی نے اینوسینٹ کایا کو آؤٹ کرکے ختم کی۔

 

اینوسینٹ کایا نے 79 گیندوں پر 92 رنز کی اننگز کھیلی جس میں 10 چوکے اور 3چھکے شامل تھے۔
کریگ ارون نے سیریز میں اپنی دوسری سنچری جارحانہ انداز میں بیٹنگ کرتے ہوئے 89 گیندوں پر 13 چوکوں اور 2 چھکوں کی مدد سے مکمل کی۔ وہ 148 گیندوں پر195 رنز کی شاندار اننگز کھیل کر آخری اوور میں رن آؤٹ ہوگئے۔ اس اننگز میں 22 چوکے اور 6 چھکے شامل تھے۔

 

یہ ایک روزہ کرکٹ میں کریگ ارون کا بہترین انفرادی اسکور بھی ہے اس سے قبل ان کا بہترین اسکور 168 رنز ناٹ آؤٹ تھا۔

یاد رہے کہ کریگ ارون نے پاکستان شاہینز کے خلاف چوتھے ون ڈے میں بھی شاندار بیٹنگ کرتے ہوئے161 رنز اسکور کیے تھے۔

کریگ ارون اور رائن برل نے چھٹی وکٹ کی شراکت میں 71 رنز کا اضافہ کیا۔ رائن برل چار چوکوں کی مدد سے31 رنز بناکر آؤٹ ہوئے۔

پاکستان شاہینز کی طرف سے فاسٹ بولر محمد علی سب سے کامیاب بولر رہے جنہوں نے سات اوورز میں 32 رنز دے کر 2 وکٹیں حاصل کیں۔عامرجمال نے دو وکٹیں 89 رنز دے کر حاصل کیں۔ مبصر خان اور قاسم اکرم کے حصے میں ایک ایک وکٹ آئی۔

پاکستان شاہینز کی پہلی تین وکٹیں صرف50 رنز پر گرچکی تھیں۔ عمران بٹ 6 اور دورے کے سب سے کامیاب بیٹسمین عمیر بن یوسف 4 رنز بناسکے۔ حسیب اللہ سات چوکوں کی مدد سے35 رنز بناکر آؤٹ ہوئے۔

کامران غلام چھ چوکوں اور ایک چھکے کی مدد سے56 رنز بناکر پویلین لوٹے۔ انہوں نے روحیل نذیر کے ساتھ چوتھی وکٹ کی شراکت میں 108 رنز کا اضافہ کیا۔

روحیل نذیر نے چھ چوکوں اور تین چھکوں کی مدد سے 91گیندوں پر 87رنز کی عمدہ اننگز کھیلی۔
انہوں نے مبصرخان کے ساتھ پانچویں وکٹ کی شراکت میں98 رنز کا اضافہ کیا۔

مبصر خان نے جارحانہ موڈ اختیار کرتے ہوئے 77 گیندوں پر115 رنز بنائے جس میں 6 چوکے اور8 چھکے شامل تھے۔یہ ان کی ایک روزہ کرکٹ میں تیسری سنچری ہے انہوں نے ٹیم کو جیت سے ہمکنار کرنے کی کوشش کی لیکن اس میں کامیاب نہیں ہوپائے تاہم ان کی اننگز فائٹ بیک کی ایک بہترین مثال تھی ۔
زمبابوے سلیکٹ کی طرف سے سکندر رضا نے 66 رنز دے کر 3 وکٹیں حاصل کیں۔

 

مختصر اسکور۔
زمبابوے سلیکٹ۔ 385رنز 7 کھلاڑی آؤٹ ( 50 اوورز ) کریگ ارون 195۔ اینوسینٹ92 محمد علی 32/2 وکٹ۔

پاکستان شاہینز۔353 ( 49 اعشاریہ 2اوورز ) مبصر خان 115 ۔ روحیل نذیر87 ۔ کامران غلام56 ۔سکندر رضا 66/3 وکٹ