چیمپئنز ٹرافی؛ افتتاحی تقریب 16 فروری کو لاہور میں ہوگی۔
(اصغر علی مبارک)
آئی سی سی چیمپئنز ٹرافی 2025 کی افتتاحی تقریب16 فروری کو لاہور میں ہوگی۔ پاکستان کرکٹ بورڈ (پی سی بی) نے چیمپئنز ٹرافی کی افتتاحی تقریبات کا شیڈول تیار کر لیا ہے،
ایونٹ کا پہلا میچ کراچی میں ہوگا تاہم افتتاحی تقریب لاہور میں کرانے کا فیصلہ کیا گیا ہے۔
چیمپئنز ٹرافی کی افتتاحی تقریب 16 فروری کو حضوری باغ لاہور میں ہوگی تاہم اس سے قبل 7 فروری کو وزیراعظم شہباز شریف قذافی اسٹیڈیم لاہور کا افتتاح کریں گے اور نیشنل اسٹیڈیم کراچی کی افتتاحی تقریب 11فروری کو ہوگی.
صدر آصف علی زرداری کی بھی 11 فروری کو نیشنل اسٹیڈیم کراچی میں ہونے والی افتتاحی تقریب میں شرکت متوقع ہے۔ اس کے علاوہ لاہور کے حضوری باغ میں منعقد ہونے والی تقریب میں ملک کی اہم شخصیات، کرکٹرز اور آئی سی سی حکام شرکت کریں گے۔
چیمپئنز ٹرافی سے قبل کپتانوں کی مشترکہ پریس کانفرنس نہ ہونے کا امکان ہے۔ آئی سی سی ون ڈے ورلڈ کپ 1996 اور 2008 کے ایشیا کپ کے بعد، پاکستان پہلی بار چیمپئنز ٹرافی 2025 کی شکل میں آئی سی سی کے کسی بڑے ایونٹ کی میزبانی کرے گا۔
چیمپئنز ٹرافی کا افتتاحی میچ میزبان پاکستان اور نیوزی لینڈ کے درمیان ہوگا جب کہ ایونٹ کا سب سے بڑا پاک بھارت میچ 23 فروری کو نیوٹرل مقام پر کھیلا جائے گا۔
چیمپئنز ٹرافی 2025 کا پہلا سیمی فائنل 4 مارچ کو نیوٹرل مقام پر کھیلا جائے گا جبکہ دوسرا سیمی فائنل 5 مارچ کو لاہور میں کھیلا جائے گا۔
آئی سی سی نے پاکستان میں 2025 سے 2027 تک ہونے والی چیمپئنز ٹرافی کے تمام ایونٹس ہائبرڈ ماڈل کے تحت منعقد ہونے کا باضابطہ اعلان کرتے ہوئے کہا تھا کہ 2028 کا ویمنز ٹی ٹوئنٹی ورلڈ کپ بھی پاکستان میں ہائبرڈ ماڈل کے تحت منعقد کیا جائے گا۔
