بھارتی کرکٹ ٹیم چیمپئنز ٹرافی میں شرکت کیلئے دبئی پہنچ گئی
دبئی: بھارتی کرکٹ آئی سی سی چیمپئنز ٹرافی 2025 میں شرکت کے لیے دبئی پہنچ گئی ہے۔
بھارتی ٹیم ممبئی سے دبئی انٹرنیشنل ائیرپورٹ پہنچی ہے، دبئی ایئرپورٹ پر شائقین کرکٹ کی کافی بڑی تعداد نے ٹیم کا استقبال کیا، ایئرپورٹ سٹاف میں شامل شائقین کرکٹ بھی کرکٹ سٹارز کو دیکھنے اُمڈ آئے۔
اس بار بھارتی کرکٹ ٹیم بغیر ذاتی عملے کے دبئی پہنچی ہے، کیونکہ بھارتی کرکٹ بورڈ نے حال ہی میں کھلاڑیوں کے ذاتی شیف اور ہیئر ڈریسرز ساتھ لے جانے پر پابندی عائد کر دی ہے، اس فیصلے کے تحت بھارتی کھلاڑیوں کو ایونٹ کے دوران دستیاب سہولیات پر انحصار کرنا ہوگا۔
تاہم ایئرپورٹ پر شائقین کرکٹ نے کرکٹرز کے ذاتی عملے کی غیر موجودگی کو ضرور محسوس کیا جو ماضی میں کرکٹ سٹارز کے ارد گرد “ ہٹو بچو “ کی صدائیں بلند کرتے ہوئے نظر آتے رہے ہیں۔
دبئی ائیرپورٹ پر موجود ایک مداح نے مذاقاً کہا، "اس بار بھارتی سٹارز کا فوکس کرکٹ پر ہوگا، نہ کہ ان کے ہیئر اسٹائل پر!”
بھارتی ٹیم میں کئی بڑے سٹارز شامل ہیں، جن میں کپتان روہت شرما، سابق کپتان ویرات کوہلی، آل راؤنڈرز ہاردک پانڈیا اور رویندرا جدیجا، جب کہ وکٹ کیپرز رشبھ پنت اور کے ایل راہول نمایاں ہیں۔ دیگر اہم کھلاڑیوں میں کلدیپ یادو، ورون چکرورتی، شریاس آئیر اور فاسٹ بولرز ارشدیپ سنگھ اور ہرشیت رانا شامل ہیں۔
بھارتی ٹیم اتوار کو آئی سی سی اکیڈمی میں دوپہر کو پریکٹس کرےگی اورکچھ پلیئرز ہوٹل میں فزیکل ٹریننگ سیشن میں حصہ لیں گے۔
یاد رہے بھارت کا پہلا میچ 20 فروری کو بنگلا دیش کے خلاف دبئی انٹرنیشنل کرکٹ سٹیڈیم میں ہوگا، یہ مقام اس وقت منتخب کیا گیا جب بھارتی بورڈ نے پاکستان کا سفر کرنے سے انکار کر دیا۔
واضح رہے کہ یہ ٹورنامنٹ پہلی بار 1996 کے ورلڈکپ کے بعد پاکستان کی میزبانی میں ہو رہا ہے اور شائقین کرکٹ میں خاصی دلچسپی پیدا کر رہا ہے۔
