آئی سی سی چیمپئنز ٹرافی 2025 کا آج سے کراچی میں آغاز،
پاکستان اس ایونٹ کا میزبان اور دفاعی چیمپئن ہے ،
افتتاحی میچ میں پاکستان اور نیوزی لینڈ مدمقابل،
کراچی ۔ آئی سی سی چیمپئنز ٹرافی 2025 میزبانی کے بھرپور تاثر اور اعزاز کے دفاع کے چیلنج کے ساتھ بدھ 19 فروری سے پاکستان میں شروع ہورہی ہے۔
پاکستان 1996 کے ورلڈ کپ کے بعد پہلی بار آئی سی سی کے کسی بین الاقوامی ایونٹ کی میزبانی کررہا ہے اور وہ اس ایونٹ کا دفاعی چیمپئن بھی ہے۔
پاکستان نے 2017 میں سرفراز احمد کی قیادت میں آئی سی سی چیمپئنز ٹرافی جیتی تھی ۔ فائنل میں اس نے انڈیا کو180 رنز سے شکست دی تھی۔
فخرزمان شاندار سنچری کی بدولت پلیئر آف دی فائنل رہے تھے جبکہ حسن علی مجموعی طور پر 13 وکٹوں کی عمدہ کارکردگی پر پلیئر آف دی ٹورنامنٹ قرار پائے تھے۔
پاکستان کرکٹ بورڈ نے آئی سی سی چیمپئنز ٹرافی 2025 کو دنیا کے سامنے بھرپور انداز میں پیش کرنے کے لیے زبردست تیاری کی ہے جس میں سب سے اہم بات قذافی اسٹیڈیم لاہور ، نیشنل بینک اسٹیڈیم کراچی اور راولپنڈی کرکٹ اسٹیڈیم راولپنڈی کی اپ گریڈیشن ہے۔
قذافی اسٹیڈیم لاہور کی تعمیر اور تزئین و آرائش صرف 117 دن کی ریکارڈ مدت میں مکمل کی گئی ہے اور یہ اسٹیڈیم انتہائی خوبصورت شکل میں اب دنیا کے سامنے ہے۔ نیشنل بینک اسٹیڈیم کراچی میں بھی نئی عمارت تعمیر کی گئی ہے جس میں ڈریسنگ رومز اور ہاسپٹلیٹی باکسز شامل ہیں۔
آئی سی سی چیمپئنز ٹرافی2025 میں آٹھ ٹیمیں شریک ہیں جن میں میزبان باکستان ۔نیوزی لینڈ ۔ انڈیا اور بنگلہ دیش گروپ اے میں شامل ہیں جبکہ گروپ بی آسٹریلیا۔ انگلینڈ ۔ افغانستان اور جنوبی افریقہ پر مشتمل ہے۔
ٹورنامنٹ کا افتتاحی ڈے نائٹ میچ بدھ کو پاکستان اور نیوزی لینڈ کے درمیان نیشنل بینک اسٹیڈیم کراچی میں کھیلا جائے گا۔ پاکستان اپنے اگلے دو گروپ میچز 23 فروری کو انڈیا کے خلاف دبئی میں اور 27 فروری کو بنگلہ دیش کے خلاف راولپنڈی میں کھیلے گا۔
گروپ مرحلے کے تین میچز کراچی میں ، تین میچز لاہور میں اورتین میچز راولپنڈی میں کھیلے جائیں گے۔انڈیا کی ٹیم اپنے تینوں گروپ میچز دبئی میں کھیلے گی۔
پہلا سیمی فائنل 4 مارچ کو دبئی میں کھیلا جائے گا۔ لاہور 5 مارچ کو دوسرے سیمی فائنل کی میزبانی کرے گا۔ اگر انڈیا کی ٹیم فائنل میں پہنچنے میں کامیاب نہ ہو پائی تو پھر9 مارچ کو فائنل لاہور میں کھیلا جائے گا بصورت دیگر یہ فائنل دبئی میں ہوگا۔
آئی سی سی چیمپئنز ٹرافی کا آغاز 1998 میں ہوا تھا اس وقت یہ ٹورنامنٹ آئی سی سی ناک آؤٹ کہلاتا تھا۔ 2002 میں اسے آئی سی سی چیمپئنز ٹرافی کا نام دیا گیا۔
پاکستان نے 2017 میں یہ ٹورنامنٹ جیتنے کے علاوہ 2000 ، 2004 اور 2009 میں اس ٹورنامنٹ کا سیمی فائنل بھی کھیلا ہے۔ آئی سی سی چیمپئنز ٹرافی میں پاکستان نے23 میں سے11 میچز جیتے ہیں جن میں انڈیا کے خلاف تین فتوحات بھی شامل ہیں۔
آئی سی سی چیمپئنز ٹرافی میں پاکستان کی جانب سے چار سنچریاں بنی ہیں۔ 2000 میں نیروبی میں سعید انور نے سری لنکا کے خلاف 105 اور پھر نیوزی لینڈ کے خلاف 104 رنز اسکور کیے تھے۔
2009 میں شعیب ملک نے انڈیا کے خلاف سنچورین میں 128 رنز اسکور کیے تھے جبکہ 2017 میں فخرزمان نے انڈیا کے خلاف اوول میں کھیلے گئے فائنل میں 114 رنز کی اننگز کھیلی تھی۔
آئی سی سی چیمپئنز ٹرافی میں پاکستان کی طرف سے بہترین انفرادی بولنگ شاہد آفریدی کی ہے جنہوں نے 2004 میں کینیا کے خلاف برمنگھم میں 11 رنز دے کر5 وکٹیں حاصل کی تھیں۔
پاکستان اسکواڈ ؛ محمد رضون ( کپتان ) ۔ سلمان علی آغا ( نائب کپتان )۔ فخرزمان۔ بابراعظم۔ سعود شکیل۔ کامران غلام۔ طیب طاہر ۔عثمان خان۔ خوشدل شاہ۔ فہیم اشرف۔ شاہین شاہ آفریدی۔ محمد حسنین۔حارث رؤف۔ نسیم شاہ اور ابرار احمد پر مشتمل ہے۔
بابراعظم۔ فخرزمان اور فہیم اشرف تین ایسے کھلاڑی ہیں جو2017 میں آئی سی سی چیمپئنز ٹرافی جیتنے والی فاتح ٹیم میں بھی شامل تھے۔
پاکستان کے میچز کا شیڈول ۔
19 فروری۔ بمقابلہ نیوزی لینڈ۔ کراچی۔
23 فروری۔ بمقابلہ انڈیا۔ دبئی۔
27 فروری۔ بمقابلہ بنگلہ دیش ۔راولپنڈی۔
