کھلاڑیوں کا مورال بلند، آسٹریلیا کو بھی ہرا سکتے ہیں: حشمت اللہ شاہدی
لاہور: افغانستان کرکٹ ٹیم کے کپتان حشمت اللہ شاہدی نے کہا ہے کہ انگلینڈ کو ہرا سکتے ہیں تو آسٹریلیا کو بھی ہرا سکتے ہیں۔
لاہور میں آسٹریلیا کے خلاف میچ سے قبل پریس کانفرنس کرتے ہوئے افغان کرکٹ ٹیم کے کپتان نے کہا ہے کہ انگلینڈ کے خلاف جیت کے بعد کھلاڑیوں کا مورال بلند ہے، آسٹریلیا ٹف ٹیم ہے، اچھا مقابلہ کریں گے اور جیتنے کی کوشش کریں گے۔
حشمت اللہ شاہدی کا کہنا ہے کہ آسٹریلیا کے خلاف جیت کر سیمی فائنل میں پہنچیں گے، یہی ہدف ہے، آسٹریلیا کے خلاف میچ میں سادہ پلان رکھیں گے، افغان فینز ہمیشہ سپورٹ کرتے ہیں، انگلینڈ کے خلاف بھی سپورٹ کیا، امید ہے کہ آسٹریلیا کے خلاف میچ میں بھی تماشائی آئیں گے۔
افغانستان کرکٹ ٹیم کے کپتان نے کہا ہے کہ ہمارے پاس سپنرز اچھے ہیں، اگر تھوڑی سی بھی مدد ملے تو ہم کسی کے خلاف بھی کامیاب ہو سکتے ہیں۔
حشمت اللہ شاہدی نے مزید کہا کہ ہم نے صرف گلین میکسویل کے خلاف پلاننگ نہیں کی ہم نے آسٹریلیا کی پوری ٹیم کے لیے پلاننگ کی ہے، ہم گلین میکسویل کے خلاف نہیں آسٹریلیا کے خلاف کھیل رہے ہیں۔
ان کا یہ بھی کہنا ہے کہ ماضی میں جو ہوا وہ تاریخ کا حصہ ہے، اب سارا فوکس کل کے میچ پر ہے، آسٹریلیا کے خلاف ہمارا جو پلان ہے اسی پر عمل کریں گے۔
