چیمپئنز ٹرافی 2025 کا فائنل آج دبئی میں بھارت اور نیوزی لینڈ کے درمیان کھیلا جائےگا
…….. اصغر علی مبارک …..
آئی سی سی چیمپئنز ٹرافی 2025 کا فائنل آج دبئی میں بھارت اور نیوزی لینڈ کی ٹیموں کے درمیان کھیلا جائےگا۔خیال رہے کہ 2 مارچ کو بھارت نے تیسرا میچ بھی دبئی کرکٹ اسٹیڈیم میں نیوزی لینڈ کے خلاف کھیلا تھا،
جہاں بھارت نے نیوزی لینڈ کو 44 رنز شکست دی تھی۔ 4 مارچ کو دبئی میں آئی سی سی چیمپئنز ٹرافی 2025 کے پہلے سیمی فائنل میں بھارت نے آسٹریلیا کو 4 وکٹوں سے شکست دے کر فائنل میں رسائی حاصل کی تھی۔
5 مارچ کو لاہور میں کھیلے گئے دوسرے سیمی فائنل میں نیوزی لینڈ نے جنوبی افریقہ کو 50 رنز سے شکست دے کر فائنل میں رسائی حاصل کی تھی۔
پاکستان میں میزبانی میں 29 سال بعد ہونے والےفائنل سے قبل، نیوزی لینڈ کو بڑا دھچکا لگا ہے، چیمپئنز ٹرافی کے تقریباً تمام میچز میں نمایاں کارکردگی دکھانے والے اہم کیوی باؤلر میٹ ہینری کی شمولیت فائنل میں غیر متوقع ہے۔
یاد رہے کہ میٹ ہینری نے چیمپئنز ٹرافی 2025 میں سب سے زیادہ 10 وکٹیں حاصل کررکھی ہیں جب کہ انہوں نے بھارت کے خلاف گروپ میچ میں 5 وکٹیں حاصل کی تھیں،
قذافی اسٹیڈیم لاہور میں کھیلے گئے جنوبی افریقہ کے خلاف سیمی فائنل کے دوران میٹ ہینری کیچ لینے کی کوشش کرتے ہوئے گرپڑے تھے جس کے بعد ان کے کندھے میں تکلیف ہوئی۔
کیوی منیجمنٹ کے مطابق میٹ ہینری کی فائنل میں شمولیت کا فیصلہ ابھی تک نہیں ہوا ہے، تاہم کپتان مچل سینٹنر اپنے باؤلر کی میچ میں شمولت سے متعلق پراعتماد ہیں۔
