کرکٹ

ثاقب خان ہیمسٹرنگ انجری کا شکار، دوسرے ٹیسٹ میں مزید بولنگ نہیں کریں گے

پی سی بی نے ثاقب خان کو سری لنکا کیخلاف دوسرے ٹیسٹ میں مزید بولنگ سے روک دیا

راولپنڈی (سپورٹس رپورٹر) پاکستان کرکٹ بورڈ (پی سی بی) نے انجری کے باعث نوجوان فاسٹ بولر ثاقب خان کو سری لنکا کے خلاف دوسرے ٹیسٹ میچ میں مزید بولنگ سے روک دیا ہے۔

ثاقب خان کو بائیں ہیمسٹرنگ میں تناؤ ہوا ہے اور وہ اس وقت ٹیم کے میڈیکل سٹاف کی نگرانی میں زیر علاج ہیں۔ پی سی بی نے تاحال ان کی مکمل صحتیابی کے حوالے سے کوئی ٹائم لائن نہیں دی ہے۔

ثاقب خان گزشتہ روز راولپنڈی کرکٹ اسٹیڈیم میں جاری دوسرے ٹیسٹ کے دوسرے روز سری لنکا کی دوسری اننگز میں اپنے دوسرے اوور کی دوسری گیند پر اوپنر لاہیرو اوڈارا کو آؤٹ کرنے کے بعد انجری کا شکار ہو کر میدان سے باہر چلے گئے تھے۔

انہوں نے اس اننگز میں صرف 1.2 اوورز بولنگ کی اور 6 رنز دے کر ایک وکٹ حاصل کی۔ ان کا باقی اوور رضا اللہ نے مکمل کیا۔

ذرائع کے مطابق ثاقب خان ضرورت پڑنے پر سری لنکا کے خلاف دوسری اننگز میں بیٹنگ کے لیے دستیاب ہوں گے۔

واضح رہے کہ ثاقب خان نے اس سے قبل سری لنکا کے خلاف پہلے ٹیسٹ میں شاندار کارکردگی کا مظاہرہ کرتے ہوئے پہلی اننگز میں 130 رنز دے کر 7 وکٹیں حاصل کی تھیں اور انہیں میچ کا بہترین کھلاڑی قرار دیا گیا تھا۔

دوسرے ٹیسٹ میں پاکستان نے پہلی اننگز میں 325 رنز بنائے تھے جبکہ سری لنکا کی ٹیم پہلی اننگز میں 98 رنز پر آؤٹ ہوگئی تھی، جس کے بعد پاکستان کو 227 رنز کی برتری حاصل ہوئی۔

دوسری جانب پی سی بی نے فاسٹ بولر علی شبیر کو ٹیسٹ اسکواڈ سے ریلیز کرکے قائداعظم ٹرافی کے آئندہ 2 راؤنڈز میں شرکت کی ہدایت کی ہے۔ 

Related Articles


Back to top button