لیاری کو پہلا پورٹیبل باکسنگ رنگ مل گیا، نوجوان خواتین باکسرز کو بااختیار بنانے کی جانب بڑا قدم
کراچی (سپورٹس لنک رپورٹر) کراچی کے تاریخی باکسنگ مرکز لیاری میں نچلی سطح کے کھیلوں اور خواتین ایتھلیٹس کے فروغ کے لیے ایک بڑا قدم اٹھاتے ہوئے صحن وائٹل فیوژن نے لیاری کا پہلا پورٹیبل باکسنگ رنگ عطیہ کر دیا، جس سے نوجوان لڑکیوں کو تربیت اور مقابلے کے لیے ایک مخصوص پلیٹ فارم میسر آ گیا۔
اس رنگ کا افتتاح ٹی ایم سی بھٹو والا اسکول، جمعہ بلوچ روڈ، آگرہ تاج کالونی میں واقع مشہور پاک شاہین باکسنگ کلب کے قریب منعقدہ فیمیل باکسنگ ایگزیبیشن کے دوران کیا گیا۔
کراچی بھر سے نوجوان خواتین باکسرز نے اس نئے رنگ میں 26 کلو گرام سے 50 کلو گرام تک کی مختلف ویٹ کیٹیگریز میں چھ مسابقتی ایگزیبیشن مقابلوں میں حصہ لیا۔
ایونٹ میں مقامی رہائشیوں، اسکول کے بچوں اور باکسنگ کے شائقین کی بڑی تعداد نے شرکت کی، جو لیاری کے باکسنگ سے گہرے لگاؤ اور خواتین باکسنگ کے لیے بڑھتی ہوئی کمیونٹی سپورٹ کا عکاس ہے۔
یہ عطیہ صحن وائٹل فیوژن کے وسیع مشن کا حصہ ہے جس کا مقصد پسماندہ کمیونٹیز میں کھیلوں کے انفراسٹرکچر کی کمی کو دور کرنا ہے، پیشہ ورانہ معیار کی سہولتیں براہ راست ان علاقوں تک پہنچانا جہاں خام ٹیلنٹ کو اکثر وسائل کی کمی کا سامنا ہوتا ہے۔
صحن وائٹل فیوژن کے صدر ڈاکٹر نسیم شیخانی نے کہا کہ ہمارا بنیادی مقصد یہ یقینی بنانا ہے کہ پسماندہ پس منظر سے تعلق رکھنے والے بچے صرف بنیادی سہولتوں کی کمی کی وجہ سے پیچھے نہ رہیں۔
ہر بچے کو اپنا ٹیلنٹ دکھانے، اپنی صلاحیتوں کو نکھارنے اور زندگی میں آگے بڑھنے کے لیے ایک پلیٹ فارم ملنا چاہیے اور لیاری کی نوجوان لڑکیوں نے ثابت کر دیا کہ وہ اس میدان کو حاصل کرنے کے لیے پوری طرح تیار ہیں۔
پاک شاہین باکسنگ کلب کے ہیڈ کوچ اور سابق قومی باکسر یونس قمبرانی نے اس اضافے کا خیر مقدم کیا اور مقامی نوجوانوں کی بے پناہ صلاحیتوں کو اجاگر کیا۔ انہوں نے کہا کہ لیاری کے بچوں میں آگے بڑھنے کا جذبہ اور حوصلہ موجود ہے،
لیکن انہیں اس توانائی کو صحیح سمت دینے کے لیے مناسب انفراسٹرکچر اور مسلسل حوصلہ افزائی کی ضرورت ہے۔ پورٹیبل رنگ ہماری نوجوان خواتین باکسرز کو اعلیٰ سطح کے مقابلوں کی تیاری کے لیے بالکل وہی ماحول فراہم کرے گا۔
ایگزیبیشن مقابلوں کے نتائج:
26 کلو گرام میں حفیفہ (شہید زاہد حسین باکسنگ کلب) نے ساویرا سنگھار کو شکست دی30 کلو گرام میں نازمین سانگھڑ (پاک شاہین) نے مہگانی کو ہرایا40 کلو گرام میں حوریان (فرید کالونی) نے ماہ نور شاہین کو شکست دی
42 کلو گرام میں ایمان (سندھ مسلم) نے عافیہ شاہین کو ہرایا46 کلو گرام میں سیما (فقیر کالونی) نے عتیقہ سانگھڑ کو شکست دی50 کلو گرام میں مناہل (بی بی ایس یو ایل) نے ثناء شاہین کو شکست دی
