ٹی 20 سیریز ؛ پاکستان کی بیٹنگ ، باؤلنگ فلاپ ! آسٹریلیا کے ہاتھوں وائٹ واش

 پاکستان کو میزبان آسٹریلیا نے چاروں شانے چت کرتے ہوئے ٹی 20 سیریز میں وائٹ واش کر دیا۔

تیسرے اور آخری ٹی ٹوئنٹی میچ میں آسٹریلیا نے پاکستان کو 7 وکٹوں سے شکست دے دی۔

پاکستان کی پوری ٹیم 117 رنز بنا کر آئوٹ ہوئی اور کینگروز کو 118 رنز کا ہدف دیا،

میزبان آسٹریلیا نے پاکستان کا 118 رنز کا ہدف 3 وکٹوں کے نقصان پر 12 ویں اوور میں حاصل کر لیا،

دونوں ٹیموں کے درمیان تیسرا اور آخری ٹی 20 میچ ہوبارٹ میں کھیلا گیا جہاں قومی کپتان سلمان علی آغا نے ٹاس جیت کر پہلے بیٹنگ کرنے کا فیصلہ کیا جو زیادہ اچھا ثابت نہ ہو سکا، قومی ٹیم مقرر 20 اوورز بھی پورے نہ کھیل سکی اور 117 رنز بنا کر ہی ڈھیر ہو گئی۔

میزبان آسٹریلیا نے پاکستان کا 118 رنز کا ہدف 3 وکٹوں کے نقصان پر 12 ویں اوور میں حاصل کر کے پاکستان کو سیریز میں کلین سویپ شکست دے دی۔

میزبان کینگروز کی جانب سے اننگز کا آغاز جیک فریزر اور میتھیو شارٹ نے کیا تاہم یہ اوپننگ جوڑی ایک بار پھر زیادہ دیر کریز پر نہ ٹھہر سکی اور میتھیو شارٹ 2 رنز بنا کر شاہین کی گیند پر عرفان خان نیازی کو کیچ دے بیٹھے۔

جیک فریزر بھی زیادہ دیر کریز پر نہ ٹھہر سکے اور 18 رنز بنا کر جہانداد خان کی گیند پر عثمان خان کو کیچ دے کر پویلین لوٹ گئے تاہم کپتان جوش انگلس نے کچھ دیر مزاحمت دکھائی اور 24 گیندوں پر 27 رنز بنا کر آؤٹ ہوئے۔

میزبان کینگروز کی جانب سے آل راؤنڈر مارکس سٹوئنس نے قومی باؤلرز کی خوب پٹائی کی اور 27 گیندوں پر 5 چوکوں اور 5 چھکوں کی مدد سے 61 رنز کی شاندار اننگز کھیل کر ناقابل شکست رہے۔

پاکستان کی جانب سے شاہین شاہ آفریدی، جہانداد خان اور عباس آفریدی نے ایک ایک وکٹ حاصل کی۔

قبل ازیں پاکستان کی جانب سے اننگز کا آغاز صاحبزادہ فرحان اور بابر اعظم نے کیا لیکن صاحبزادہ فرحان ایک بار پھر ناکام ثابت ہوئے اور صرف 9 رنز بنا کر آؤٹ ہو گئے جبکہ حسیب اللہ 24 رنز بنا کر چلتے بنے۔

دوسرے ٹی 20 میں ففٹی سکور کرنے والے عثمان خان صرف 3 رنز بنا سکے جبکہ قومی ٹیم کے کپتان سلمان علی آغا 9 گیندوں پر صرف ایک رن بنا کر پویلین لوٹ گئے۔

سابق کپتان بابر اعظم 41 رنز بناکر ایڈم زمپا کی گیند پر کلین بولڈ ہو کر چلتے بنے، عرفان خان نیازی کی قسمت نے ساتھ نہ دیا اور 10 رنز بنا کر رن آؤٹ ہو گئے جبکہ عباس آفریدی محض ایک رن کے مہمان ثابت ہوئے۔

پاکستان کی 116 رنز پر یکے بعد دیگر 8 ویں اور نویں وکٹ گری، شاہین آفریدی 16، جہانداد خان 5 رنز بنا کر پویلین لوٹ گئے جبکہ سفیان مقیم ایک رن بنا کر جانسن کا شکار بنے۔

آسٹریلیا کی جانب سے ایرون ہارڈی نے 3، سپینسر جانسن اور ایڈم زمپا نے 2،2 جبکہ ناتھن ایلس اور بارٹلیٹ نے ایک، ایک کھلاڑی کو آؤٹ کیا۔

قومی ٹیم میں آج دو تبدیلیاں کی گئی ہیں، کپتان محمد رضوان کو آخری ٹی 20 میں آرام دیا گیا ہے اور انہیں کوئی انجری نہیں ہے، رضوان کی جگہ آج کے میچ میں سلمان علی آغا کپتانی کر رہے ہیں تاہم حسیب اللہ وکٹ کیپنگ کے فرائض سر انجام دے رہے ہیں جبکہ نسیم شاہ کی جگہ جہانداد خان کا ڈیبیو ہوا ہے۔

واضح رہے کہ تین ٹی ٹوئنٹی میچوں کی سیریز میں آسٹریلیا کو دو صفر کی فیصلہ کن سبقت حاصل ہے۔

آسٹریلیا نے پہلے ٹی ٹوئنٹی میں پاکستان کو 29 اور دوسرے میچ میں 13 رنز سے شکست دی تھی۔ پاکستانی ٹیم اب تک کینگروز کو آسٹریلیا میں ٹی 20 میچ میں شکست نہیں دے سکی ہے۔

واضح رہے کہ اسی دورے کے دوران پاکستان ٹیم نے آسٹریلیا کو ون ڈے سیریز میں دو، ایک سے شکست دی اور یہ 22 سال بعد گرین شرٹس کی کینگروز کی سر زمین پر ون ڈے سیریز میں پہلی فتح ہے۔

قومی ٹیم ; پاکستانی پلیئنگ الیون میں کپتان سلمان علی آغا سمیت صاحبزادہ فرحان، بابر اعظم، حسیب اللہ، عثمان خان، محمد عرفان خان نیازی، عباس آفریدی، شاہین شاہ آفریدی، جہانداد خان، حارث رؤف اور سفیان مقیم شامل ہیں۔

آسٹریلوی سکواڈ ; آسٹریلیا کا سکواڈ جیک فریزر، میتھیو شارٹ، جوش انگلس (کپتان)، گلین میکسویل، ٹیم ڈیوڈ، مارکس سٹوئنس، ایرون ہارڈی، زیویئر بارٹلیٹ، ناتھن ایلس، ایڈم زمپا اور سپینسر جانسن پر مشتمل ہے۔