چیمپئنز ٹرافی پاکستان کی عزت، شائقین کو بہترین سہولیات دیں گے: محسن نقوی
لاہور: آئی سی سی چیمپئنز ٹرافی ٹورنامنٹ کی ڈولی دھوم دھام سے اٹھانے کی تیاریاں جاری ہیں، قذافی سٹیڈیم دلہن کی طرح سجنا شروع ہو گیا، نئی جدید کرسیوں کی تنصیب بھی مکمل ہو گئی ہے جبکہ 4 ماہ کی ریکارڈ مدت میں نیا سٹیڈیم جدید سہولتوں سے آراستہ کر دیا گیا۔
چیئرمین پاکستان کرکٹ بورڈ (پی سی بی) محسن نقوی نے قذافی سٹیڈیم کا تفصیلی دورہ کیا، ورکرز سے ملاقات کی اور انہیں دن رات کام پر شاباش دی، انہوں نے ورکرز کو 8 فروری کا ٹرائی نیشن سیریز کا میچ دیکھنے کی بھی دعوت دی اور کہا کہ میں خود آپ کے ساتھ بیٹھ کر میچ دیکھوں گا۔
محسن نقوی نے نئی نشستوں پر بیٹھ کر سٹیڈیم کا ویو دیکھا، تمام فلورز، نئے ڈریسنگ رومز اور مختلف شعبوں کا معائنہ کیا، محسن نقوی نے نئے ہاسپٹلٹی باکسز کا بھی مشاہدہ کیا۔
اس موقع پر گفتگو کرتے ہوئے محسن نقوی نے کہا ہے کہ انشاءاللہ نئے قذافی سٹیڈیم کا افتتاح فروری کے پہلے ہفتے میں کیا جائیگا، پاکستان کی تاریخ میں پہلی بار جدید ترین بین الاقوامی سہولتوں سے مزین سٹیڈیم تیار کیا گیا ہے۔
چیئرمین پی سی بی نے مزید کہا ہے کہ کھلاڑیوں کے ساتھ شائقین کرکٹ نئی سہولتوں سے محظوظ ہوں گے، ہماری پوری ٹیم نے دن رات محنت سے کام کیا اور ناممکن ٹاسک کو ممکن بنایا، چیمپئنز ٹرافی ٹورنامنٹ پاکستان کی عزت ہے اور ہم اپنے وطن کی عزت میں مزید اضافہ کریں گے۔
پراجیکٹ ڈائریکٹر ایف ڈبلیو او نے منصوبے پر پیش رفت سے آگاہ کیا جبکہ وزیر داخلہ و چیئرمین پی سی بی محسن نقوی نے ایف ڈبلیو او کی ٹیم کو خصوصی طور پر شاباش دی۔
ایڈوائزر عامر میر، چیف آپریٹنگ آفیسر سمیر احمد، ڈائریکٹرز انفراسٹرکچر، ڈومیسٹک کرکٹ، ایف ڈبلیو او اور نیسپاک کے متعلقہ حکام بھی اس موقع پر موجود تھے۔
