والدہ کے انتقال کے بعد بہت مشکل سے خود کو سنبھالا ‘فاسٹ بولر نسیم شاہ .

پاکستان کرکٹ ٹیم کے فاسٹ بولر نسیم شاہ نے کہاہے کہ انہوں نے والدہ کے انتقال کے بعد بہت مشکل سے خود کو سنبھالا، والدہ کے غم کو کم کرنے کے لئے انہیں ادویات کا سہارا لینا پڑا۔

ایک انٹرویومیں انہوں نے بتایا کہ 2019 میں 16 برس کی عمر میں جس وقت کرکٹ میں ڈیبیو کیا اس وقت اپنی والدہ کو کھو دیا، یہ مشکل وقت تھا

لیکن اپنی والدہ کی خواہش کو مدنظر رکھتے ہوئے میچ کھیلا۔انہوں نے ایک سوال کا جواب دیتے ہوئے کہا کہ یہ ان کی زندگی کا بہت مشکل وقت تھا، اس حوالے سے اب بھی کسی سے بات نہیں کرسکتے کیونکہ انہیں اپنے غم دنیا کے سامنے لانا پسند نہیں ہے۔انہوں بتایا کہ والدہ کا غم اس قدر شدید تھا کہ

اس سے نکلنے اور سکون حاصل کرنے کے لئے ادویات کا سہارا بھی لینا پڑا۔ انہوں نے کہاکہ اب گاؤں میں اپنے گھر جانا مشکل لگتا ہے، وہاں جاتا ہوں تو والدہ کی یادیں تازہ ہوجاتی ہیں لگتا ہے کہ وہ گھر میں بیٹھی ہیں اور ان سے دل کی باتیں شیئر کر رہا ہوں۔ ابھی بھی اگر کبھی پریشان ہوں تو اپنے خیالوں میں

ان سے باتیں کرتا ہوں۔انہوں نے کہا کہ یہ ہی وجہ ہے کہ اب کوشش ہوتی ہے کہ کم سے کم گاؤں جاؤں بلکہ اب ان تمام چیزوں کو بھولنا شروع کردیا ہے جن سے والدہ کی یادیں جُڑی ہیں۔