آئی او سی کا نیا طریقہ کار: ایتھلیٹ نمائندگی، عالمی مقبولیت اور لاگت کی بنیاد پر کھیلوں کا انتخاب

برسبین اولمپکس 2032 کے کھیلوں کا حتمی پروگرام اپریل 2027 میں طے ہوگا، آئی او سی

ڈاکار: انٹرنیشنل اولمپک کمیٹی (آئی او سی) نے اعلان کیا ہے کہ برسبین 2032 اولمپک گیمز کے سپورٹس پروگرام کو اپریل 2027 میں حتمی شکل دی جائے گی۔

یہ فیصلہ آئی او سی کے 147 ویں سیشن میں ہوگا جو جمہوریہ ڈومینیکن کے شہر پنٹا کانا میں منعقد ہوگا۔ اس ٹائم لائن کی منظوری آئی او سی ایگزیکٹو بورڈ نے ڈاکار میں ڈاکار 2026 یوتھ اولمپکس سے قبل اپنے اجلاس میں دی۔

برسبین 2032 پہلے اولمپک گیمز ہوں گے جن میں آئی او سی کے نئے "فٹ فار دی فیوچر" اصلاحاتی طریقہ کار کو لاگو کیا جائے گا۔ اس نئے نظام کے تحت کھیلوں کو زیادہ لچکدار، متعلقہ اور پائیدار بنایا جائے گا۔

ہر کھیل کو معروضی معیار پر پرکھا جائے گا، جس میں ایتھلیٹس کی نمائندگی، عالمی مقبولیت، لاگت اور آپریشنل پیچیدگی شامل ہے۔ یہ طریقہ کار بین الاقوامی فیڈریشنز کے ساتھ قریبی مشاورت سے تیار کیا گیا ہے۔

اگلے مرحلے کے طور پر، آئی او سی ایگزیکٹو بورڈ دسمبر 2026 میں اس بات کی تصدیق کرے گا کہ کون سے موجودہ ڈسپلنز کو خودکار طور پر شامل کرنے کی سفارش کی جائے گی،

 کن کو تقابلی جائزے سے گزرنا ہوگا، اور کن امیدوار ڈسپلنز کو خارج کیا جائے گا۔ توقع ہے کہ زیادہ تر موجودہ ڈسپلنز کو خودکار طور پر برقرار رکھا جائے گا۔

واضح رہے کہ برسبین 2032 اولمپکس 23 جولائی سے 8 اگست 2032 تک شیڈول ہیں۔