9 وکٹیں گریں، سب ہار مان گئے، پھر شاداب نے وہ کر دیا جو تاریخ میں نہیں ہوا
لاہور (نمائندہ سپورٹس لنک) قذافی سٹیڈیم لاہور میں کرکٹ تاریخ کا ایک اور ناقابل یقین معرکہ، پاکستان نے انگلینڈ کو ایک وکٹ سے شکست دے دی۔ آل راؤنڈر شاداب خان 113 رنز ناٹ آؤٹ کے ساتھ ہیرو بن گئے۔
سہ ملکی ون ڈے سیریز کے چوتھے میچ میں انگلینڈ نے ٹاس جیت کر پہلے بیٹنگ کا فیصلہ کیا۔ انگلینڈ کا آغاز اچھا نہ تھا لیکن بین ڈکٹ نے ایک اینڈ سنبھالے رکھا۔ ڈکٹ نے 111 گیندوں پر 105 رنز کی شاندار اننگز کھیلی، جس میں 10 چوکے اور 2 چھکے شامل تھے۔
ان کے علاوہ کوئی بلے باز 30 رنز سے آگے نہ جا سکا۔ انگلینڈ کی پوری ٹیم 46.4 اوورز میں 241 رنز بنا کر آؤٹ ہو گئی۔پاکستان کی جانب سے کپتان شاہین شاہ آفریدی نے شاندار باؤلنگ کا مظاہرہ کیا۔
شاہین نے 9.4 اوورز میں 46 رنز دے کر 4 وکٹیں حاصل کیں اور اپنے ون ڈے کیریئر کی 150 وکٹیں بھی مکمل کر لیں۔ فاسٹ باؤلر حارث رؤف نے 1 جبکہ نوجوان لیگ سپنر رضا اللہ نے 2 کھلاڑیوں کو آؤٹ کیا۔ سلمان آغا اور شاداب خان نے ایک ایک وکٹ لی۔
پاکستان کی تباہ کن شروعات اور شاداب کا معجزہ
242 رنز کے ہدف کے تعاقب میں پاکستان کی بیٹنگ مکمل طور پر فلاپ ہو گئی۔ اوپنر فخر زمان 10، صائم ایوب 6 اور بابر اعظم صرف 10 رنز بنا کر آؤٹ ہو گئے۔
31 رنز پر 3 وکٹیں گرنے کے بعد سعد بیگ نے 22 گیندوں پر 32 رنز کی تیز اننگز کھیل کر کچھ امید دلائی، لیکن ان کے آؤٹ ہوتے ہی وکٹوں کی لائن لگ گئی۔ سلمان آغا 26، حسن نواز 15 اور عثمان خان 12 رنز بنا کر آؤٹ ہوئے۔
ایک وقت پر پاکستان کا سکور 154 رنز پر 9 وکٹیں تھا اور 88 رنز ابھی باقی تھے۔ قذافی سٹیڈیم میں خاموشی چھا چکی تھی اور شائقین سٹیڈیم چھوڑ کر جانے لگے تھے۔
آخری وکٹ پر 89 رنز کی تاریخی شراکت
اس موقع پر شاداب خان نے ہار ماننے سے انکار کر دیا۔ شاداب نے پہلے دفاع کیا اور پھر انگلینڈ کے باؤلرز پر حملہ آور ہو گئے۔ انہوں نے حارث رؤف کے ساتھ مل کر دسویں وکٹ پر 89 رنز کی ناقابل شکست شراکت قائم کی،
جو پاکستان کی ون ڈے تاریخ کی دوسری بڑی آخری وکٹ کی شراکت ہے۔شاداب خان نے 96 گیندوں پر 13 چوکوں اور 5 چھکوں کی مدد سے 113 رنز کی ناقابل شکست اننگز کھیلی۔
یہ ان کے ون ڈے کیریئر کی پہلی سنچری ہے اور نمبر 8 پر بیٹنگ کرتے ہوئے دنیا کی تیسری بڑی اننگز بھی ہے۔ حارث رؤف نے 19 گیندوں پر 7 رنز بنا کر بہترین ساتھ دیا۔
پاکستان نے 47.1 اوورز میں 9 وکٹوں کے نقصان پر 243 رنز بنا کر ایک وکٹ سے سنسنی خیز فتح حاصل کر لی۔
مین آف دی میچ
شاداب خان کو ان کی ریکارڈ ساز سنچری پر مین آف دی میچ کا ایوارڈ دیا گیا۔ اس فتح کے بعد پاکستان سہ ملکی سیریز میں 4 پوائنٹس کے ساتھ دوسرے نمبر پر آ گیا ہے۔
واضح رہے کہ میچ کے دوران امپائر کی جانب سے ایل بی ڈبلیو آؤٹ قرار دیے جانے پر شاداب خان نے مایوسی کا اظہار کرتے ہوئے کریز پر اپنا بیٹ پٹخ دیا، تاہم پویلین واپس جانے سے قبل انہوں نے ری ویو لینے کا فیصلہ کیا۔
اس وقت شاداب خان 97 رنز بنا چکے تھے اور میچ کے 44 اوورز مکمل ہو چکے تھے۔ ری ویو میں واضح ہوا کہ گیند بیٹ سے ٹکرائی تھی، جس پر تھرڈ امپائر نے انہیں ناٹ آؤٹ قرار دے دیا۔
ناٹ آؤٹ قرار دیے جانے کے بعد شاداب خان نے حارث رؤف کے ساتھ مل کر باقی 21 رنز مکمل کیے اور پاکستان کو ایک وکٹ سے سنسنی خیز کامیابی دلا دی۔ اس فتح کے ساتھ ہی قومی ٹیم نے ٹرائی نیشن سیریز کے فائنل میں بھی جگہ بنا لی۔
شاداب خان نے اسی میچ کے دوران ون ڈے انٹرنیشنل کرکٹ میں اپنے ایک ہزار رنز بھی مکمل کیے۔ انہوں نے یہ سنگ میل اپنے 74ویں ون ڈے میچ میں عبور کیا۔
