ویمن لیگ نمائشی میچز، کھلاڑیوں کی تیاریاں مکمل، ٹرافی کی تقریب رونمائی کردی گئی

ویمنز ٹی20 لیگ کے نمائشی میچز کیلئے میدان سج گیا۔انگلش لورین ونفلیڈ، ڈینی وائٹ، مایا بوچیئر اور ٹمی بیماؤنٹ، جنوبی افریقی لارا وولورڈٹ اور آئرش لورا ڈینلی کی بھی پاکستان آمد ہو گئی، بنگلہ دیش کی جہاں آرا عالم اور سری لنکن چماری اتاپتو اتوار کی شب آگئی تھیں۔

نمائشی میچز کا حصہ بننے والی دونوں ٹیموں ایمازونز اور سپر ویمن نے اسلام آباد کرکٹ کلب میں پریکٹس کی، ٹرافی کی رونمائی بھی ہوئی، کپتانوں نے ٹرافی تھام کر فوٹو سیشن کرایا، نمائشی میچز 8، 10 اور 11 مارچ کو پنڈی کرکٹ سٹیڈیم میں کھیلے جائیں گے۔

دوسری جانب ان مقابلوں کیلئے کمنٹری پینل کا بھی اعلان کردیا گیا، اس میں ثناء میر، عروج ممتاز، مرینہ اقبال، وقار یونس، ایلن ویکنز، بازید خان، ڈینی موریسن، ڈیرن گنگا، مارک بوچر، سکندر بخت اور سائمن ڈول شامل ہیں جبکہ زینب عباس اور ایرن ہالینڈ پریزینٹرز ہوں گی۔

یاد رہے کہ پی ایس ایل کی طرز پر مجوزہ ویمنز لیگ سے قبل پی سی بی ان آزمائشی میچز سے ایونٹ کی ممکنہ مقبولیت کا اندازہ کرنے کی کوشش کرے گا۔