مینز ایمرجنگ ایشیا کپ : پاکستان شاہینز کی سری لنکا روانگی ; ٹورنامنٹ 13 سے23 جولائی تک کولمبو میں کھیلا جائے گا۔

 

 

مینز ایمرجنگ ایشیا کپ : پاکستان شاہینز کی سری لنکا روانگی

لاہور 10 جولائی۔ پاکستان شاہینز کرکٹ ٹیم منگل کی علی الصبح لاہور سے براستہ دبئی سری لنکا روانہ ہورہی ہے جہاں وہ اے سی سی مینز ایمرجنگ ایشیا کپ میں حصہ لے گی۔ وکٹ کیپر بیٹر محمد حارث ٹیم کی قیادت کررہے ہیں۔

 

یہ ٹورنامنٹ 13 سے23 جولائی تک کولمبو میں کھیلا جائے گا۔

پچاس اوورز فارمیٹ کے اس ٹورنامنٹ میں آٹھ ٹیمیں حصہ لے رہی ہیں اور اس میں مجموعی طور پر پندرہ میچز کھیلے جائیں گے۔

 

پاکستان شاہینز کو گروپ بی میں انڈیا اے ۔ نیپال اور متحدہ عرب امارات اے کے ساتھ رکھا گیا ہے۔
پاکستان شاہینز اپنا پہلا میچ 14 جولائی کونیپال کے خلاف کھیلے گی17 جولائی کو اس کا دوسرا میچ متحدہ عرب امارات اے کے خلاف ہوگا جبکہ 19جولائی کو وہ انڈیا اے کے خلاف مدمقابل ہوگی۔
ہر گروپ سے دو ٹاپ ٹیمیں سیمی فائنل میں جگہ بنائیں گی۔سیمی فائنلز 21 جولائی کو کھیلے جائیں گے جبکہ فائنل 23 جولائی کو ہوگا۔

 

ٹیم کے پندرہ کھلاڑیوں اور چار ریزرو کھلاڑیوں نے ٹیم کی سری لنکا روانگی سے قبل نیشنل کرکٹ اکیڈمی لاہور میں چھ روزہ کیمپ میں حصہ لیا جس کی نگرانی ہیڈ کوچ محمد مسرور کی سربراہی میں کوچنگ اسٹاف نے کی۔

کیمپ میں کھلاڑیوں نے پچاس اوورز کی کرکٹ سے متعلق مختلف پہلوؤں پر کام کیا۔

 

پاکستان شاہینز ٹورنامنٹ کی دفاعی چیمپئن ہے جسے محمد حارث ( پانچ ون ڈے انٹرنیشنل ، نو ٹی ٹوئنٹی انٹرنیشنل ) کے علاوہ دیگر سات ایسے کھلاڑیوں کی خدمات حاصل ہیں جو اس سے قبل پاکستان کی انٹرنیشنل کرکٹ میں نمائندگی کرچکے ہیں۔ان میں ارشد اقبال ( ایک ٹی ٹوئنٹی انٹرنیشنل ) کامران غلام ( ایک ون ڈے انٹرنیشنل ) محمد وسیم جونیئر ( دو ٹیسٹ۔ چودہ ون ڈے انٹرنیشنل اور ستائیس ٹی ٹوئنٹی انٹرنیشنل ) ۔صاحبزادہ فرحان ( تین ٹی ٹوئنٹی انٹرنیشنل ) صائم ایوب ( آٹھ ٹی ٹوئنٹی انٹرنیشنل) شاہنواز دھانی ( دو ون ڈے انٹرنیشنل ، گیارہ ٹی ٹوئنٹی انٹرنیشنل ) اور طیب طاہر ( تین ٹی ٹوئنٹی انٹرنیشنل ) شامل ہیں۔

 

کپتان محمد حارث کا کہنا ہے کہ ہم ٹورنامنٹ کے لیے پوری طرح تیار ہیں۔ دفاعی چیمپئن ہونے کا پریشر ہمیں متاثر نہیں کرے گا کیونکہ ہم تمام چیزوں کو سادہ رکھیں گے اور مستقل مزاجی سے پرفارمنس کی کوشش کریں گے۔

محمد حارث کا کہنا ہے کہ کیمپ کے دوران کھلاڑیوں نے بھرپور جذبے اور محنت کے ساتھ ٹریننگ کی ہے اور یہ ٹریننگ سری لنکا کی کنڈیشنز کو مدنظر رکھتے ہوئے کی گئی ہے۔چونکہ ہم اس سے قبل بھی سری لنکا میں کھیل چکے ہیں ہم اس چیلنج سے آشنا ہیں جس کا سامنا ہمیں کرنا ہے۔

 

محمد حارث کا کہنا ہے کہ ٹیم کا کامبی نیشن عمدہ ہے اور ٹیم باصلاحیت کھلاڑیوں پر مشتمل ہے اور انہیں ہر کھلاڑی کی صلاحیتوں پر مکمل بھروسہ ہے۔ یہ ٹورنامنٹ کھلاڑیوں کو بہترین موقع فراہم کرے گا کہ وہ اپنی بہترین کارکردگی سے مستقبل میں قومی ٹیم میں جگہ بنائیں۔ مستقبل قریب میں پاکستانی ٹیم کے کئی وائٹ بال میچز شیڈول ہیں لہذا ان کھلاڑیوں کے لیے اچھا موقع ہے کہ وہ اپنی عمدہ کارکردگی سے ٹیم میں جگہ بناسکیں۔

 

ٹیم کے ہیڈ کوچ محمد مسرور کا کہنا ہے کہ کیمپ میں تمام کھلاڑیوں نے سخت محنت کی ہے جو قابل تعریف ہے۔انہیں یقین ہے کہ یہ ٹورنامنٹ ان کھلاڑیوں کو بہترین موقع فراہم کرے گا کہ وہ اپنی صلاحیتیں اور مہارت دکھائیں۔

 

محمد مسرور کا کہنا ہے کہ اسکواڈ میں شامل متعدد کھلاڑیوں نے نوجوان کرکٹرز کے ساتھ اپنے تجربات شیئر کیے ہیں ۔ یہ ٹیم کے نقطہ نظر سے بڑی اہمیت کی بات ہے اور انہیں امید ہے کہ یہ ہم آہنگی میدان میں اچھے نتائج کی صورت میں سامنے آئے گی اور ٹورنامنٹ میں ایک بھرپور تاثر چھوڑے گی۔

 

پاکستان شاہینز ان کھلاڑیوں پر مشتمل ہے۔

محمد حارث ِ( کپتان وکٹ کیپر ) ( پشاور ) ۔ عمیر بن یوسف ( نائب کپتان ) ( کراچی ) ۔ عماد بٹ ( سیالکوٹ ) ۔ارشد اقبال( صوابی ) حسیب اللہ ( کوئٹہ ) کامران غلام ( پشاور ) مہران ممتاز ( راولپنڈی ) مبصر خان ( اسلام آْباد) محمد وسیم جونیئر ( شمالی وزیرستان ) قاسم اکرم ( لاہور ) صاحبزادہ فرحان ( چارسدہ ) صائم ایوب ( کراچی) شاہنواز دھانی ( لاڑکانہ ) سفیان مقیم ( آزاد جموں کشمیر) اور طیب طاہر ( گجرات )

ریزرو کھلاڑیوں میں عبدالواحد بنگلزئی۔ محمدعباس آفریدی۔ محمد جنید اور روحیل نذیر شامل ہیں۔
پلیئرز سپورٹ اسٹاف میں شاہد اسلم ( منیجر ) محمد مسرور ( ہیڈ کوچ ) حنیف ملک ( بیٹنگ اور فیلڈ نگ کوچ ) عمر رشید ( بولنگ کوچ ) اور امتیاز احمد ( فزیوتھراپسٹ ) شامل ہیں۔

 

پاکستان شاہینز کا شیڈول اس طرح ہے۔

14جولائی ۔ بمقابلہ نیپال۔
17 جولائی۔ بمقابلہ متحدہ عرب امارت اے ۔
19جولائی ۔ بمقابلہ انڈیا اے۔