بیکن ہاؤس علامہ اقبال ٹاؤن کیمپس کا سالانہ سپورٹس ڈے ، پاکستان انڈر 19 ٹیم کی کھلاڑیوں کی شرکت

بیکن ہاؤس علامہ اقبال ٹاؤن کیمپس کا سالانہ سپورٹس ڈے

پاکستان انڈر 19 ٹیم کی کھلاڑیوں کی شرکت، طلبہ میں جوش و خروش

فزہ فیاض اور میمونہ خالد کی شرکت نے تقریب کو چار چاند لگا دیے

لاہور: بیکن ہاؤس علامہ اقبال ٹاؤن کیمپس (اے آئی ٹی سی) میں سالانہ سپورٹس ڈے 2026 جوش و خروش سے منایا گیا

لاہور کے بیکن ہاؤس علامہ اقبال ٹاؤن کیمپس میں اپر پرائمری سیکشن کے زیر اہتمام سالانہ سپورٹس ڈے 2026 کا شاندار انعقاد کیا گیا۔ بدھ کے روز منعقدہ اس تقریب میں ننھے طلبہ و طالبات نے اپنی کھیلوں کی مہارت اور ایتھلیٹک صلاحیتوں کا بھرپور مظاہرہ کیا۔

تقریب کی مہمان خصوصی پاکستان انڈر 19 کرکٹ ٹیم کی کپتان فزہ فیاض تھیں، ان کے ہمراہ انڈر 19 ٹیم کی کھلاڑی میمونہ خالد بھی موجود تھیں۔ 

اسکول پرنسپل شازیہ حسنات، ہیڈ مسٹریس حمیرا نعمان اور سپورٹس کوچ فرحان مسعود نے معزز مہمانوں کا پرتپاک استقبال کیا۔

سپورٹس کوچ فرحان مسعود کی زیر نگرانی تربیت یافتہ طلبہ نے مختلف کھیلوں میں حصہ لیا اور ٹیم ورک، ڈسپلن اور مسابقتی جذبے کا شاندار مظاہرہ کیا۔

 تقریب میں پیش کی جانے والی ایروبکس پرفارمنس نے سب کی توجہ حاصل کر لی اور مہمانوں و تماشائیوں سے خوب داد سمیٹی۔

اس موقع پر خطاب کرتے ہوئے پرنسپل شازیہ حسنات نے کہا کہ سالانہ سپورٹس ڈے کا مقصد طلبہ میں تعلیمی سرگرمیوں کے ساتھ ساتھ جسمانی سرگرمیوں کے توازن کو فروغ دینا اور صحت مند طرز زندگی کو اپنانا ہے۔ 

انہوں نے زور دیا کہ اسکول نوجوان ٹیلنٹ کو نکھارنے، اعتماد پیدا کرنے اور طلبہ کو قومی و بین الاقوامی سطح پر مقابلہ کرنے کے لیے تیار کرنے کے ساتھ تعلیم اور کھیل دونوں میں بہترین کارکردگی کے لیے پرعزم ہے۔