اسلام آباد میں جے-60 بارڈ فائونڈیشن جونیئر ورلڈ ٹینس چیمپئن شپ شروع
جے-60 بارڈ فاؤنڈیشن جونیئر ورلڈ ٹینس چیمپئن شپ کا آج 31 اکتوبر 2026 کو پاکستان ٹینس فیڈریشن (پی ٹی ایف) ٹینس کمپلیکس، گارڈن ایونیو، اسلام آباد میں باقاعدہ آغاز ہوگیا۔
چیمپئن شپ میں مجموعی طور پر 58 کھلاڑی حصہ لے رہے ہیں، جن میں 36 بوائز اور 22 گرلز شامل ہیں۔ یہ کھلاڑی 14 ممالک روس، ہانگ کانگ، چین، تھائی لینڈ، قازقستان، بنگلہ دیش، سری لنکا، سربیا، آسٹریلیا،
اسپین، کینیڈا، بیلاروس، سویڈن اور پاکستان کی نمائندگی کر رہے ہیں۔ اس بین الاقوامی ایونٹ کی سرپرستی بارڈ فاؤنڈیشن کر رہی ہے، جس کا تعاون پاکستان میں جونیئر ٹینس کے فروغ اور ترقی میں اہم کردار ادا کر رہا ہے۔
پاکستان ٹینس فیڈریشن کے صدر جناب اعصام الحق قریشی، سیکریٹری جنرل کرنل ضیاء الدین طفیل اور پی ٹی ایف انتظامیہ نے تمام شریک کھلاڑیوں اور آفیشلز کا پاکستان آمد پر پرتپاک استقبال کیا اور چیمپئن شپ کے لیے نیک تمناؤں کا اظہار کیا۔
پی ٹی ایف کے صدر جناب اعصام الحق قریشی نے فیڈریشن کی جانب سے مقامی کھلاڑیوں کو بین الاقوامی سطح پر ٹینس کھیلنے کے مواقع فراہم کرنے کے لیے جاری کوششوں کو اجاگر کیا۔
انہوں نے کہا کہ پاکستان ٹینس فیڈریشن ملک میں مسلسل بین الاقوامی ٹینس ایونٹس کا کامیابی سے انعقاد کر رہی ہے،
جن میں ورلڈ ٹینس ویمنز ورلڈ ٹینس ٹور کے دو ٹورنامنٹس، بلی جین کنگ کپ ایشیا/اوشیانا گروپ تھری مقابلے اور اب مسلسل تین ورلڈ ٹینس جونیئر ٹورنامنٹس شامل ہیں۔
ان جونیئر چیمپئن شپ کے بعد پی ٹی ایف ورلڈ ٹینس مینز ورلڈ ٹینس ٹور (فیوچرز) کے دو بین الاقوامی ٹورنامنٹس کی میزبانی بھی کرے گی۔
انہوں نے اس بات پر زور دیا کہ ان بین الاقوامی چیمپئن شپ کا پاکستان میں انعقاد مقامی جونیئر کھلاڑیوں کے لیے ایک بہترین موقع ہے، جس کے ذریعے وہ اپنے ملک میں رہتے ہوئے بین الاقوامی کھلاڑیوں کے خلاف مقابلہ کر سکتے ہیں،
قیمتی بین الاقوامی میچز کا تجربہ حاصل کر سکتے ہیں، ورلڈ ٹینس رینکنگ پوائنٹس حاصل کر سکتے ہیں اور بیرونِ ملک سفر کیے بغیر اپنی عالمی درجہ بندی بہتر بنا سکتے ہیں۔
جناب اعصام الحق قریشی اور کرنل ضیاء الدین طفیل نے بھی پاکستان میں ٹینس کے فروغ اور ترقی کے لیے فراخدلانہ مالی معاونت اور مسلسل تعاون فراہم کرنے پر بارڈ فاؤنڈیشن کا تہہ دل سے شکریہ ادا کیا۔
نتائج; بوائز کوالیفائنگ، پہلا راؤنڈ: یوپئی لیانگ (چین) نے روہان سمیر (پاکستان) کو 0-6، 0-6 سے شکست دی۔
ووکاشین پاولووچ (سربیا) نے نکولس سیوانتوس (اسپین) کے خلاف واک اوور حاصل کیا۔
کوالیفائنگ کا آخری راؤنڈ کل یکم نومبر 2026 کو کھیلا جائے گا۔
